Qostanaıda «Faýna Eır» áýe kompanııasynyń An-2 ushaqtarynyń ushýyna tyıym salyndy
QOSTANAI. QazAqparat - Qostanaı oblysynda avıatsııa-hımııa jumystaryn júrgizetin «Faýna Eır» JShS zańsyz ushaqty paıdalandy degen kúdikke ilikti, dep habarlaıdy QazAqparat tilshisi QR ınvestıtsııalar jáne damý mınıstri Jeńis Qasymbekke silteme jasap.
24 shildede QR IDM kólik oqıǵalary jáne oqys oqıǵalardy tekserý departamentiniń avıatsııa oqıǵalaryn jáne oqys oqıǵalardy tekserý basqarmasynyń basshysy Nurlan Jumasultanov «Faýna Eır» ıeligindegi barlyq An-2 ushaqtarynyń ushýyna tyıym salǵan.
«Ashyq dıalogta» mınıstr Jeńis Qasymbektiń málimdeýinshe, Qostanaı oblysy, Altynsarın aýdany, Dokýchaev aýyldyq okrýginde 2018 jylǵy 23 shildede avıatsııa oqıǵasy bolǵan. Ushaqtyń aıtarlyqtaı zaqymdanǵanyn rastaıtyn fotosýretter de taralǵan. Jergilikti turǵyndardyń aıtýynsha, buzylǵan ushaqty bólshekterge bólip, júk kóligimen Aqmola oblysynyń Atbasar qalasyna alyp ketken.
Atbasarda mınıstrlik komıssııasyna bort nómiri UP-A0316, kók tústi ushaq kórsetilgen, al Qostanaı oblysynda buzylǵan ushaq qyzǵysh túste bolǵan.
«ıAǵnı, Dokýchaev aýyldyq okrýginde qyzǵysh tústi basqa An-2 ushaǵymen avıatsııalyq oqıǵa bolǵan, biraq onyń da bort nómiri - UP-A0316. Osy jaıt «Faýna Eır» JShS zańsyz ushaqty paıdalandy degen kúdikke negiz bolyp otyr», - deıdi J. Qasymbek.
Mınıstrdiń aıtýynsha, osyǵan baılanysty «Faýna Eır» JShS paıdalanyp jatqan barlyq ushaqty tekserý qajettiligi týyndap, olardyń ushýyna tyıym salynǵan.
