Qostanaıda esirtkini jarnamalaǵan jasóspirim ustaldy

QOSTANAI. QazAqparat - Qostanaıda sıntetıkalyq esirtkini jarnamalaǵan 17 jastaǵy jasóspirim ákimshilik jaýapkershilikke tartyldy, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.

Rýdnyı qalasynda júrgizilgen «Kóknar-2019» jáne «Paýtına» jedel-aldyn alý is-sharalary barysynda polıtsııa qyzmetkerleri avtobýs aıaldamalary men transformatorlyq býdkalardyń qabyrǵalaryna graffıtı salǵan 17 jastaǵy jigitti ustady. Atalmysh jazýlar sıntetıkalyq esirtki jarnamalaıtyn ınternet saıttyń elektrondyq mekenjaıy bolyp shyqqan.

«Polıtsııa qyzmetkerleriniń anyqtaýy boıynsha, jetkinshek Rýdnyı qalasynyń turǵyny jarnama arqyly aqsha tapqysy kelgen. Úı syrtyndaǵy jarnama jazbasyn kórip, ol belgisiz adammen baılanysqan. Internet arqyly hat almasý barysynda sońǵysy oǵan belgili bir somaǵa úıler men basqa da ǵımarattardyń qasbetterine graffıtı jasaýdy usynǵan», - delingen vedomstvonyń baspasóz habarlamasynda.