Qostanaıda emtıhan bıletteriniń jańa formaty tanystyryldy
QOSTANAI. QazAqparat - «Qostanaı - adaldyq alańy» jobalyq keńsesi oblystyń joǵary oqý oryndaryna aýyzsha emtıhan tapsyrý úshin erekshe bıletter jasaýdy usyndy. Mundaı jańashyldyq respýblıkada birinshi ret engizilip otyr, dep habarlaıdy QazAqparat.
Uıymdastyrýshylardyń aıtýynsha, bul bastamanyń basty maqsaty - emtıhan ýaqytynda sybaılas jemqorlyq táýekelderin joıý. Emtıhan bıletteriniń jańa formaty A. Baıtursynov atyndaǵy Qostanaı memlekettik ýnıversıtetiniń stýdentterine tanystyryldy.
Memleket qyzmet isteri agenttiginiń oblystyq departamenti baspasóz qyzmeti atap ótkendeı, emtıhan bıletteriniń keri jaǵynda 1424 call - ortalyǵynyń, «Qostanaı - adaldyq alańy» jobalyq keńsesiniń telefony kórsetilgen. Sondaı-aq, «Adaldyq - bolashaqqa ınvestıtsııa», «Satylmaýshylyq - sapaly bilim kepili», «Sáttilik kásibı mamandardy jaqsy kóredi» uran-sózderi jazylǵan.
«Emtıhan bıletinde pándik suraqtar ornalastyrylsa, onyń keri jaǵy bos turady. Sondyqtan, sybaılas jemqorlyqqa qarsy materıaldardy jazý úshin emtıhan bıletterin paıdalanýdyń qısyndy ıdeıasy týyndady. Buǵan qosa, sessııa barysynda oblystyń barlyq joǵary oqý oryndarynda baıqaýshylar retinde qoǵamdyq uıymdar qatysady», - dep túsindirdi vedomstvonyń baspasóz hatshysy Aıda Bajırova.
