Qostanaıda elsiz dalada joǵalyp ketken kúzetshi úsh kúnnen keıin tabyldy
Adasyp ketken Altynsarın aýylynyń turǵyny joǵalǵaly úsh kún ótkende týra týǵan kúninde tabyldy.
Qamysty aýdanynyń polıtsııa bólimine «Altynsarıno» JShS brıgadasynyń basqarýshysy dala turaǵynda kúzetshisiniń joǵalyp ketkenin aıtqan.
Er adam túnde jumys ornynan ketip, dalada adasyp ketýi múmkin dep boljanǵan.
Dereý polıtsııa qyzmetkerleri tótenshe jaǵdaılar bóliminiń mamandarymen jáne JShS qyzmetkerlerimen birlesip izdeýdi bastady.
Úsh kún boıy olar dalanyń ár jerin qarady. Arnaıy tehnıka, sonyń ishinde dron qoldandy.
Joǵalǵan kúzetshi daladaǵy shaǵyn sý qoımasynyń janynan tiri kúıinde tabyldy.
- Sol túni er adam ózin nashar sezinip, medıtsınalyq kómek kútpes úshin aýylǵa óz betinshe jetpek bolǵan. Biraq qarańǵyda adasyp ketken. Álsiregen ol jaqyn mańdaǵy sý qoımasyna jetkenshe dalany kezip júrdi. Ony sol jerden taýyp aldyq, - deıdi Qamysty aýdandyq polıtsııa bólimi JKB jedel ýákili Nıkolaı Vasılıı.
Qazirgi ýaqytta Altynsarın aýyly turǵynyna aýdandyq aýrýhanada medıtsınalyq kómek kórsetilip jatyr.
Óıtkeni aǵzasy ábden álsirep, qaljyraǵan. Endi ómirine qaýip joq.
Osy ýaqyt ishinde er adamnyń týystary da izdeý sharalaryna qatysty.
Tabylǵan kúzetshiniń uly «Altynsarıno» JShS dırektorynyń orynbasary Ashat Ábilovke, № 3 brıgada basqarýshysy Maksım Maevskııge, aýdan polıtseılerine jáne TJ qyzmetkerlerine, ákesin izdeýge kómekteskenderdiń bárine alǵysyn aıtty.
