Qostanaıda elektr qýatynyń tapshylyǵy baıqalady: qalany ne kútip tur
ASTANA. KAZINFORM — Qostanaıda qazirdiń ózinde elektr qýatynyń tapshylyǵy baıqalady. 2040 jylǵa qaraı elektr jelisine túsetin júkteme úsh eseden asýy múmkin, dep habarlaıdy Kazinform tilshisi.
Bul máseleni sheshý úshin qalanyń Bas josparyna engizilgen túzetýler alty jańa elektr qosalqy stansasyn salýdy, sondaı-aq qoldanystaǵy energetıkalyq ınfraqurylymdy jańǵyrtýdy qamtıdy.
Josparǵa sáıkes, 2030 jylǵa qaraı Qostanaıda tórt qosalqy stansa salynady: «Ońtústik» (220 kV), «Barys» (110 kV), «Ortalyq» (110 kV) jáne «Shyǵys» (110 kV).
2040 jylǵa qaraı taǵy eki qosalqy stansa — «Qurǵaq port» jáne «Ýzkokoleınaıa» (árqaısysy 110 kV) qurylysy josparlanyp otyr. Olar qalanyń soltústik bóligindegi jańa óndiristik jáne logıstıkalyq aımaqtardy elektr energııasymen qamtamasyz etedi.
Árbir qosalqy stansa Qostanaıdyń naqty aýdandaryna qyzmet kórsetedi.
Atap aıtqanda, «Ońtústik» qosalqy stansasy qalanyń ońtústik bóligin jáne Qonaı aýdanyn elektr qýatymen qamtamasyz etedi. «Barys» Qostanaıdyń ońtústik-batys bóligine, «Ortalyq» ortalyq aýdandarǵa, al «Shyǵys» Tobyl ózeni boıyndaǵy aýmaqqa qyzmet kórsetedi.
«Qurǵaq port» jáne «Ýzkokoleınaıa» qosalqy stansalary qalanyń soltústigindegi bolashaq ónerkásiptik jáne logıstıkalyq nysandarǵa arnalǵan.
Qazirgi ýaqytta «Qurǵaq port» jáne «Shyǵys» stansalarynyń oryndary anyqtalǵan. Qalǵan nysandardyń ornalasýy, sondaı-aq bolashaq elektr jelileriniń baǵyttary aldaǵy ýaqytta egjeı-tegjeıli josparlaý kezinde naqtylanady.
Jańa qosalqy stansalardy salý jáne qoldanystaǵy ınfraqurylymdy jańǵyrtý turǵyn úı aýdandaryn damytýǵa, áleýmettik nysandar salýǵa jáne jańa ónerkásipterdi ashýǵa qajetti elektr qýatyn beredi.
Alataý qalasynyń energetıkalyq jáne ınjenerlik ınfraqurylymy týraly myna jerden oqyńyz.
