Qostanaıda ekologııalyq otyn jaǵylatyn qazandyq iske qosylady
ASTANA. QazAqparat - Qostanaıda qatty otyn jáne kógildir otyn jaǵylatyn qazandyqtardan tys, bıylǵy qys maýsymyna oraı saban jáne aǵash jońqalary jaǵylatyn qazandyqtar iske qosylady. Bul týraly Alau.kz habarlaıdy.
Ekologııalyq otyn jaǵatyn qazandyq Amangeldi kentinde synaqtan ótkizilmek. Ol qazir jalpy jylýmen qamtý júıesine qosylǵan. Qazandyqqa qajetti otyn kómir nemese gazǵa qaraǵanda aıtarlyqtaı arzan ári ekologııalyq jaǵynan taza. Bir ret toltyrylǵan qazandyq táýlik boıy jylý beredi.
«Ónimdiligi 0,6-1 gıgakalorııanyń aınalasynda, ıaǵnı 50 páterli bes qabatty úıdi jylytýǵa jetkilikti», - deıdi Qostanaı jylý-energetıka kompanııasynyń bas ınjeneri Nıkolaıa Belıak.
Degenmen, gazben jumys isteıtin taǵy bir qazandyq ta daıyn tur. Qajet bolǵanda ony da qosýǵa bolady.
Bıyl Qostanaıda qazandyqtar men jylýmen qamtý júıesin jóndeýge 3 mıllıard teńge mólsherinde qarajat bólingen. Qala bıliginiń málimdeýinshe, qazan aıyna deıin-aq daıyndyq jumystary aıaqtalýy tıis.
«Bıyl ınvestıtsııalyq baǵdarlama boıynsha úshinshi sý jylytatyn qazanǵa kúsh salynyp jatyr, oǵan 21 mıllıon teńge bólingen. Ekinshi týrbınany jóndeý mindeti de tur. Ony 10 tamyzdan 25 qyrkúıekke deıingi aralyqta oryndaımyz», - deıdi Qostanaı JEO bas ınjeneri Konstantın Nagornyı.
Kommýnaldyq qyzmetkerlerdiń aıtýynsha, daıyndyq jumystaryn erterek bastaýǵa Eýropa qaıta qurý jáne damý bankiniń qarjylandyrýdy keshiktirýi sebep bolǵan. Degenmen, jylýmen qamtýshylar qysqa daıyndyqty aıaqtaýdyń merzimi men sapasyna bul áser etpeıtinin aıtyp otyr.
