Qostanaıda ekinshi muz saraıy nege salyndy – Arhımed Muhambetov jaýaby
NUR-SULTAN. QazAqparat – Qostanaı oblysynyń ákimi Arhımed Muhambetov oblys ortalyǵyna ekinshi muz saraıynyń ne úshin salynǵanyn túsindirdi, dep habarlaıdy QazAqparat tilshisi.
Búgin Úkimettiń keńeıtilgen otyrysynda QR Prezıdenti Qasym-Jomart Toqaev Qostanaıda 4,5 mlrd teńgege muz saraıy salynatynyn, odan bólek jaqynda jóndeýden ótken taǵy bir muz saraıy baryn aıtty.
«Oblysta aýyldardy sýmen qamtý máselesi kúıip tur, sý tazartý qurylǵylary apatty jaǵdaıda, mektepterde oryn joq, monoqalalar máselesi bar. Arhımed Bekjanuly, bul qalaı?», - dep surady Prezıdent óńir basshysynan.
Qostanaı ákimi qoldanystaǵy muz saraıynyń tozyp ketkenin aıtty.
«Ondaǵy jabdyqtar 100% eskirgen, jeldetý, elektr júıesi - 90% tozǵan, Shatyryna zaqym kelgen. Barlyq qujattar men tekserý aktisi bar. Sondyqtan, qalalyq qoǵamdyq keńes eski muz saraıyn jekpe-jek saraıyna aınaldyrýdy uıǵardy», - dedi Arhımed Muhambetov.
Ákimniń aıtýynsha, jańa muz saraıy tıimdi jaǵdaıda salynady jáne ony kútip-baptaýǵa qarajat kerek emes.
«Sheteldikter ózderi qyzmet kórsetedi», - dep túıindedi ákim.
