Qostanaıda eki jataqhana boı kótermek
Oblysta tehnıkalyq jáne kásiptik bilim berý uıymdarynyń ishinde 38 kolledj bar. Olardyń 31-i - memlekettik, qalǵany - jeke menshik bilim mekemeleri. Kolledjderde barlyǵy 22 myń stýdent bilim alady. Vasılıı Tsymbalıýk aıtqandaı, osy jyly APEC PetroTechnic qaǵıdasy boıynsha eki quzyrettilik ortalyǵyn qurý boıynsha jumys jalǵasýda. Ótken jyly osy maqsatqa jergilikti bıýdjetten 233,8 mln teńge bólinip, áleýmettik seriktesterdiń 31 mln teńgesi tartyldy.
«2019 jyly oblystyq bıýdjetten 3 kolledjdiń materıaldyq-tehnıkalyq bazasyn nyǵaıtýǵa 80,5 mln teńge bólindi. Atap aıtqanda, Lısakov tehnıkalyq kolledji, Rýdnyı qurylys jáne kólik kolledji, Rýdnyı taý-ken tehnologııalyq kolledji tolyq jóndeýden ótedi. Sondaı-aq, Memleket basshysynyń úshinshi bastamasyn júzege asyrý aıasynda avtomobıl kóligi men polıtehnıkalyq joǵary kolledjderine árqaısysy 500 oryndyq eki jataqhana salý josparlanýda», - dedi basqarma basshysy.
Qazirgi ýaqytta kolledj qurylysynyń jobalyq-smetalyq qujattary saraptamaǵa jiberildi. Tıisinshe, shilde aıynda bilim basqarmasy qurylys jumystaryna kirisedi.
