Qostanaıda eki kólik soqtyǵysyp, úsh adam kóz jumdy
QOSTANAI. QazAqparat – Qostanaı oblysynda eki kólik soqtyǵysyp, úsh adam kóz jumdy, dep habarlaıdy QazAqparat.
Oqıǵa búgin «Qostanaı-Sarykól» tasjolynyń 15-shi shaqyrymynda bolǵan. 44 jastaǵy er adam basqarǵan «Mıtsýbısı Lanser» avtokóligi joldyń qarsy baǵytyna shyǵyp ketip, «VAZ 2170» kóligine soqtyǵysqan.
«33 jastaǵy «VAZ» júrgizýshisi oqıǵa ornynda, 5 jasar bala oblystyq balalar aýrýhanasynda kóz jumdy. «Mıtsýbısı Lanser» jolaýshysy jedel-járdem qyzmetiniń kóliginde kóz jumdy. Osy fakt boıynsha sot aldy tekserý sharalary bastaldy, saraptama taǵaıyndaldy», - dedi polıtsııanyń baspasóz hatshysy Irına Bejenar agenttik tilshisine.
Qostanaılyq polıtseıler kólik júrgizýshilerin barynsha saq bolýǵa shaqyrady. Aldaǵy aptada oblystyń tasjoldarynda kóktaıǵaq bolatynyn eskertedi.
