Qostanaıda eki adam adasyp, úsip ketken
QOSTANAI. QazAqparat - Áýlıekól aýdanynyń qutqarýshylary dalada adasyp ketken eki turǵyndy taýyp aldy, dep habarlaıdy QazAqparat oblystyq TJD baspasóz qyzmetine silteme jasap.
Aýdandyq TJ bólimine 4 naýryz kúni saǵat 22:00 shamasynda Kóktal aýylynyń eki turǵynynyń adasyp ketkeni týraly habarlama kelip túsken. Belgili bolǵandaı, 46 jastaǵy er adammen 47 jastaǵy áıel jaıaý Qaramendi aýylyna qaraı baǵyt alǵan.
«Adasyp ketken turǵyndardy izdeýge TJ bóliminiń eki qyzmetkeri «Nıva» kóligimen shyqty. Іzdeý sharalary barysynda qutqarýshylar únemi baılanysqa shyǵyp turdy. Olar adasqandardyń nazaryn aýdarý úshin «Áýlıekól-Jaldama» tasjolynan 5 shaqyrym jerdegi shóp úımelesin órtedi. Osylaısha, joǵalyp ketken turǵyndar alystan kóringen jaryqqa qaraı júrgen», - delingen oblystyq TJD baspasóz qyzmeti habarlamasynda.
Qutqarýshylar saǵat 02:40-ta er adamdy taýyp alǵan. Munan soń saǵat 03:00-de úsip ketken áıel qutqaryldy.
