Qostanaıda egis alqabynyń jaı-kúıin arnaıy apparattar qadaǵalaıdy
QOSTANAI. QazAqparat - Qostanaıdaǵy aýyl sharýashylyǵy kásiporyndary «Tsıfrly Qazaqstan» baǵdarlamasy boıynsha zamanaýı tehnologııalardy paıdalanyp jatyr, dep habarlaıdy QazAqparat.
Qarabalyq aýdanyndaǵy «Astyq ındýstrııasy agroholdıngi» basshysy Dáýlet Ahmetqalıevtiń sózinshe, sharýashylyqty tsıfrlandyrý boıynsha jumystar bastalyp ketti.
«Memleket basshysynyń bıylǵy Qazaqstan halqyna joldaýynda aýyl sharýashylyǵy salasyn tsıfrlandyrýǵa basa nazar aýdardy. Bul turǵyda «Astyq ındýstrııasy agroholdıngi» egin sharýashylyǵyn avtomattandyrýǵa alǵashqy qadamyn jasady. Holdıng quramyna kiretin «Toǵyzaq elevatory» JShS jylyna 140 myń tonna astyq jáne untaqtalǵan jem saqtaýǵa qaýqarly. Atalǵan seriktestik óndiriste ekologııalyq taza aýyl sharýashylyǵy ónimderin alý úshin zamanaýı tehnologııalardy paıdalanýda», - dedi Ahmetqalıev.
Sonymen, «Astyq ındýstrııasy agroholdıngi» adam eńbegin shyǵyndamaı, dala jumystaryn jeńildetý úshin «GeoSkan-201 Agro» dep atalatyn ushatyn apparatty paıdalanbaq.
«Bul apparat aerofototúsirilim júrgizip, egisterdiń jaı-kúıi, saqtalý deńgeıi, ylǵal men qorektik elementter týraly naqty ýaqyt rejıminde aqparat beredi. «GeoSkan-201 Agro» kórsetken derekter negizinde vegetatsııalyq ındeksterdi zertteý kartasy qurylady. Munan soń sharýalar astyqtyń damý fazalaryn baqylaı alady», - dep túsindirdi seriktestik basshysy.
Eske salsaq, Qostanaı oblysynda 20 aýyl sharýashylyǵy kásiporny agrarlyq-ónerkásiptik keshenderdi tsıfrlandyrý jobasyna qatysý úshin iriktelip alyndy.
