Qostanaıda dropperlik boıynsha alǵashqy isterdiń ekeýi sotqa joldandy

ASTANA. KAZINFORM — Qostanaı oblysynyń Jitiqara qalasynda prokýrorlar dropperlik boıynsha aıyptalǵan eki jergilikti turǵynǵa qatysty qylmystyq isterdi sotqa joldady, dep habarlaıdy oblystyq prokýratýranyń baspasóz qyzmeti.

Sotqa deıingi tergep-tekserý barysynda olardyń aqshalaı syıaqy úshin buryn tanys emes tulǵalarǵa úsh banktik shotqa qoljetimdilikti bergeni anyqtaldy. Keıinnen atalǵan shottar alaıaqtyq áreketter nátıjesinde jábirlenýshilerden urlanǵan aqsha qarajatyn shyǵarý úshin paıdalanylǵan.

Sotqa deıingi tergep-tekserý barysynda aıyptalýshylar óz kinálaryn tolyq moıyndady.

Aıta keteıik, 2025 jylǵy qyrkúıekten bastap zańnamaǵa banktik shottarǵa, tólem quraldaryna jáne sáıkestendirý quraldaryna qoljetimdilikti zańsyz berý, tabystaý jáne alý, sondaı-aq tólemdermen aqsha aýdarymdaryn zańsyz júrgizý úshin jaýapkershilikti kózdeıtin jańa qylmystyq quqyq buzýshylyq quramy engizildi. Atalǵan baptyń sanktsııasy múlikti tárkileýmen birge 7 jylǵa deıin bas bostandyǵynan aıyrý jazasyn kózdeıdi.

Bıyl jyl basynan beri oblysta Qylmystyq kodeksi (dropperlik) boıynsha 22 qylmystyq is tirkeldi, onyń ishinde 2 is sotqa joldandy. Óńirde alaıaqtyqqa qarsy qabyldanyp jatqan sharalardyń nátıjesinde alaıaqtyqtyń jalpy sany 19,1%-ǵa (293-ten 237-ge deıin), al ınternet-alaıaqtyq 12,3%-ǵa (235-ten 206-ǵa deıin) tómendegeni baıqalady.

Sotqa deıingi tergep-tekserý organdarynyń usynystary boıynsha ekinshi deńgeıdegi bankter jalpy somasy 307 mln teńgeni quraıtyn 112 nesıeni toqtatty. Sottarda jalpy somasy 293 mln teńgeni quraıtyn 191 talap-aryz qanaǵattandyryldy. Qostanaı oblysynyń prokýratýrasy azamattardy qyraǵylyq tanytýǵa, kúmándi «jeńil tabys» usynystaryna aldanbaýǵa jáne ózderiniń banktik shottary men jeke derekterin úshinshi tulǵalarǵa bermeýge shaqyrady. 

Osydan buryn elde dropperlikke qatysty qylmystyq ister sany aıtarlyqtaı óskenin jazǵan edik.