Qostanaıda demalys lagerinde 45 bala ýlanyp, tórteýi aýrýhanaǵa jatqyzyldy
QOSTANAI. QazAqparat - Qostanaıdaǵy «Mereı» demalys lagerinen aýrýhanaǵa ótkir gastroenterokolıt dıagnozymen 4 bala jetkizildi. Bul aqparatty Qostanaı qalasy Balalar aýrýhanasynyń bas dárigeri Ásııa Báımenova rastady.
Ásııa Báımenova taıaý kúnderi taldaý nátıjeleri daıyn bolǵanda, naqty dıagnoz qoıylatynyn aıtty.
«Qazir statsıonarǵa túsken balalardyń jaǵdaıy ortasha aýyr deńgeıinde. Lagerdiń medpýnktinde taǵy 41 balanyń asqazanyn jýý rásimi júrgizildi», - dep atap ótti Á. Báımenova. Óńirdegi Tutynýshylardyń quqyqtaryn qorǵaý departamentiniń basshysy Azamat Qamshymbaev «Ýlaný týraly aqparat kelip túsken sátten bastap, departament mamandary birden «Mereı» lagerine jiberilgenin» málimdedi. Qamshymbaevtyń aıtýynsha, oqıǵany tergeýge quqyq qorǵaý organdarynyń qyzmetkerleri tartyldy. Ýlanýdyń alǵashqy jaǵdaıy 4 tamyzda tirkeldi. Júrgizilip jatqan tergeý barysynda ashanada balalarǵa berilgen taǵamdardan synama alyp zerdelenýde. A.Qamshymbaev qazirgi ýaqytta Bas prokýratýradan «Mereı» lagerine jospardan tys tekserý júrgizýge ruqsat kútip otyrǵanyn aıtty. Lagerdiń dırektory Ǵabıt Qusaıynovtyń pikirinshe, bolǵan jaǵdaıdy jappaı ýlanýǵa jatqyzýǵa bolmaıdy. «Balalar aýrýhanaǵa ár jasaqtan jetkizildi. Lagerde qazir bári qalpy jaǵdaıda, balalardyń deni saý, shaǵym joq. Lagerde barlyǵy 440 bala demalýda»,- dedi Ǵ. Qusaıynov.
