Qostanaıda dárigerdi óltirý isi boıynsha basty kúdikti ustaldy
QOSTANAI. QazAqparat - Qostanaı oblystyq psıhonevrologııalyq dıspanseriniń burynǵy bas dárigeri Rashıda Sandybaevany óltirý qylmystyq isi boıynsha basty kúdikti ustaldy, dep habarlaıdy «QazAqparat» HAA tilshisi.
Bul aqparatty Qostanaı oblystyq ІІD-niń baspasóz qyzmetinde rastady.
«Qostanaı oblystyq ІІD qyzmetkerleri júrgizgen jedel-izdestirý sharalary barysynda 2017 jyldyń 17 sáýiri kúni Rýslan Gafarov ustaldy, - dep habarlady mekemeniń baspasóz qyzmetinen. - Qylmys jasady dep aıtyptalyp otyrǵan kúdikti Qostanaı qalasynda páterlerdiń birinde ustaldy. Qazirgi ýaqytta ol ýaqytsha ustaý oqshaýlaǵyshyna qamaldy».
Eske sala ketsek, 2017 jyldyń 20 aqpanynda tanymal dáriger, oblystyq psıhonevrologııalyq dıspanserdiń burynǵy bas dárigeri Rashıda Sandybaevanyń qatigezdikpen óltirilgen denesi óz páterinen tabyldy.
Jedel-izdestirý sharalarynyń kesheni júrgizilgennen keıin, qysqa merzimde atalmysh atyshýly qylmysty jasaǵan 40 jastaǵy jáne 25 jastaǵy er adamdardyń (buryn isti bolǵan) jáne 45 jastaǵy kúdikti - psıhonevrologııalyq dıspanserdiń bólim meńgerýshisiniń aty-jónderi anyqtaldy. Olardyń barlyǵy tutqyndaldy. Sotqa deıingi tergeý amaldary jalǵasýda.
