Qostanaıda dári-dármek baǵasy turaqty
QOSTANAI. QazAqparat - Farmatsevtıka ókilderi men oblystyq ákimdiktiń ózara yntymaqtastyq týraly memorandýmynyń nátıjesinde dári-dármek baǵasynyń negizsiz qymbattaýy anyqtalǵan joq. Bul týraly ákimdikte ótken jıynda aıtyldy, dep habarlaıdy QazAqparat tilshisi.
QR Densaýlyq saqtaý Farmatsııa komıtetiniń Qostanaı oblysy boıynsha Departamenti basshysy Sáýle Erjanovanyń sózinshe, oblys boıynsha búginde medıtsınalyq jáne farmatsevtıkalyq buıymdardy satý jáne taratýmen aınalysatyn 660 mekeme bar. Onyń ishinde 318-i - dárihana.
«Farmatsııa departamenti jyl basynan beri 28 tekserý jumystaryn júrgizdi. Nátıjesinde farmatsevtıkalyq qyzmetti atqarýǵa lıtsenzııasy joq jáne dárilik zattardy saqtaý erejelerin buzǵan eki medıtsınalyq uıymǵa ákimshilik shara qoldanyldy. Kóterme jáne bólshek saýdamen aınalysatyn dárihanalarǵa tıisti farmatsevtıkalyq tájirıbe standarttaryn engizýde aýqymdy jumys atqarýǵa týra keledi. Oblysta halyqaralyq talaptar júıesine 297 dárihana men 28 dárihana qoımasyn kóshirý kózdelgen», - dedi basqarma basshysy.
Dárihanalarda halyqtyń áleýmettik osal toptaryna 3-ten 30 paıyzǵa deıin jeńildikter qarastyrylǵan. Sondaı-aq, osy kúnge deıin farmatsevtermen jasalǵan memorandýmǵa sáıkes 105 dárilik zattyń baǵasy qymbattamaǵan. Mysaly, «Bıosfera» dárihanasynda «Levarızın» tabletkasy 840 teńge turady. Al, «Tsvetnaıa» jeke dárihanasynda bul dáriniń baǵasy - 845 teńge.
Óńir basshysy osy qol qoıylǵan ózara yntymaqtastyq týraly kelisim talaptarynyń bolashaqta buzylmaý kerektigin aıtty.
«Eki taraptyń kelisimi boıynsha oblystaǵy dári satatyn oryndar baǵany asyrmaıdy. Máselen, mýkaltın dárisiniń bir qoraby 300 teńgeden aspaıdy», - dedi Sáýle Erjanova.
