Qostanaıda dári-dármek alý úshin qomaqty qarjy jumsalmaq
QOSTANAI. QazAqparat - Qostanaı oblysynda dárigerlik kómek tek saqtandyrý paketteri arqyly kórsetiletin bolady. Tıisinshe, medıtsınalyq qyzmet kórsetetin mekemelerdiń sany kóbeıgen, dep habarlaıdy QazAqparat tilshisi.
Oblys boıynsha áleýmettik medıtsınalyq saqtandyrý qoryna jarnalar men aýdarymdardan 617 mln teńge qarajat tústi. Bul qarjy jańa medıtsınalyq qyzmetter men dári-dármek alýǵa, saqtandyrylǵan azamattarǵa dárigerlik kómek berýge jumsalady.
Óńirdegi bilikti dáriger Jumaǵalı Erkinbaıdyń aıtýynsha, medıtsınalyq saqtandyrý qazirgi densaýlyq saqtaý júıesindegi keıbir kemshilikterdi joıyp, saladaǵy jumysty ońtaıly júıeleýge jol ashady.
«Munyń nátıjesinde qyzmet sapasy artady. Qostanaıda qurylǵan arnaıy aqparattyq top medıtsınalyq saqtandyrý jaıly halyqqa keńinen túsindirýde. Mindetti áleýmettik medıtsınalyq saqtandyrý júıesine tirkelýden oblys turǵyndary tys qalmaýy tıis», - deıdi dáriger.
Medıtsınalyq saqtandyrý áleýmettik qor arqyly júzege asady. Qordyń jumysyn memleket qadaǵalap otyrady. Arnaıy monıtorıng júrgiziledi. Halyq tarapynan túsken shaǵymdar men sapaǵa qatysy bar aqparat tirkelip, nazarda bolady.
Búginde 66 mekeme medıtsınalyq qyzmet usynbaq. Qańtardan bastap kórsetiletin kómek túrine daıyndyq qyzý júrip jatyr.
Qostanaı oblystyq mindetti áleýmettik medıtsınalyq saqtandyrý qorynyń fılıaly barlyq qyzmet túrleriniń sapasyn qadaǵalaıdy. Ol úshin arnaıy qurylǵan fms.kz saıtynda «Halyqtyq baqylaý» bólimi bar. Munda shaǵymdar men aryzdar qabyldanyp, onlaın rejımde qaralady.
