Qostanaıda Dańq alleıasy ashylady
Qostanaıdaǵy Jeńis kúni merekesi ortalyq alańdaǵy teatrlandyrylǵan kórinispen bastaldy. Oblystyq qazaq jáne orys teatrlarynyń ártisteri Ekinshi dúnıejúzilik soǵys kezinde jazǵan jas sarbazdardyń elge hatyn oqydy. Al óńir basshysy Arhımed Muhambetov jyl ótken saıyn bul merekeniń mańyzdylyǵy arta túskenin aıtty.
«Mıllıondaǵan adamnyń ómirin qıǵan surapyl soǵystyń aıaqtalǵanyna búgin týra 73 jyl tolyp otyr. Ekinshi dúnıejúzilik soǵys 1700 qala men kentti kúıretti, birneshe myń kásiporyn isten shyqty. Biraq, atalarymyz ben ájelerimizdiń arqasynda beıbit kún keship otyrmyz. Soǵys kezinde qostanaılyqtardyń da aldyńǵy shepte júrgenin maqtanyshpen aıta alamyz. Bizdiń oblysymyzdan 73 myńnan astam sarbaz soǵysqa attandy. Solardyń 24 myńnan astamy urys alańdarynda, 3,5 myńy gospıtaldarda alǵan jaraqattarynan qaza boldy. Taǵy 16 myńǵa jýyq soldat habarsyz ketti. Aıta ketý kerek, Qazaqstanǵa ondaǵan áskerı zaýyttar kóshirildi, olar da erler ǵana emes, sondaı- aq áıelder, qarttar, balalar janqııarlyqpen eńbek etti. Soǵys jyldaryndaǵy barlyq aýyrtpalyqtar solardyń ıyqtaryna tústi. Tek Qostanaıǵa ǵana 10 kásiporyn men mekeme jiberildi. Oblys ortalyǵynda birneshe kóshirilgen gospıtaldar, Stalıngrad áskerı-avıatsııa ýchılışesi ornalastyryldy», - dedi Arhımed Muhambetov.
Búginde Qostanaı oblysynda 165 EDS ardageri turady. Oblys basshysy bıyl soǵys ardagerleriniń qurmetine Dańq alleıasy ashylatynyn málim etti.
«Otan úshin jan qıǵandar - keshegi tarıhtyń kózi. Jalpy Qostanaı oblysynda soǵys ardagerleriniń qurmetine 295 eskertkish ornatyldy, oblys ortalyǵyndaǵy birneshe kóshe solardyń esimderimen atalady. Lenıngrad úshin bolǵan urysta jaý ambrazýrasyn denesimen jaýyp, erlikpen qaza tapqan Sultan Baımaǵambetov, Dneprdiń batysyndaǵy Medvın aýdanynda dushpannyń 3 tankisin, qarý tıegen 7 mashınasy men bir batalonǵa jýyq áskerin joıǵan Estaı Esjanov atamyzdyń erligi ańyz bolyp aıtylady. Mine, osy jyly batyr babalarymyzdyń qurmetine Dańq alleıasyn ashamyz», - dedi óńir ákimi.
Dańq alleıasy qala ortalyǵyndaǵy «Jeńis» saıabaǵynan ashylmaq. Qurylysy jaýyq arada bastalady. Onda soǵys ardagerlerine arnalǵan 31 eskertkish boı kóteredi.
