Qostanaıda dalada júrgen maldy atyp alǵan top ustaldy

NUR-SULTAN. QazAqparat – Qostanaı oblysynda dalada júrgen maldy atyp alyp, satýmen aınalysqan qylmystyq top ustaldy. Bul týraly QR ІІM resmı ókili Nurdildá Oraz aıtty, dep habarlaıdy QazAqparat tilshisi.

«Qostanaılyq polıtseıler dalada júrgen maldy atyp alýmen aınalysqan barymtashylar tobyn ustady. Kúdiktiler dalada júrgen maldy kúndiz baıqap, túnde atyp alǵan. Sol jerde soıyp, etin alypsatarlar arqyly dúkenderge ótkizgen», - dedi Nurdildá Oraz Іshki ister mınıstrliginiń baspasóz qyzmeti alańynda ótken brıfıng barysynda.

Onyń atap ótýinshe, urlyq jaıylymda, kúzetilme ıtin aımaqta oryn alǵan. Dál osy jaıt arnaýly operatsııa júrgizýge biraz qıyndyqtar týdyrǵan.

«Qazirgi ýaqytta toptyń 5 qatysýshysy ustalyp, ýaqytsha oqshaýlaǵyshqa qamaldy. Olardyń Amangeldi aýdany aýmaǵyndaǵy 3 jáne Arqalyq qalasynda 3 mal urlaý faktisine qatysy bar ekendigi anyqtaldy. Kúdiktilerdiń birin tintý barysynda zattaı aıǵaq, onyń ishinde tirkelgenmen «IJ-12» markaly myltyq pen oǵy tárkilendi. Ballıstıtkalyq saraptama taǵaıyndaldy. Sotqa deıingi tergeý aıasynda kúdiktilerdiń dál osyndaı ózge de qylmystarǵa qatysy anyqtalyp jatyr», - dedi resmı ókil.