Qostanaıda tsıfrlyq habar taratý júıesi iske qosyldy
1 shildeden bastap Qostanaı oblysy teleradıo habarlardy tek tsıfrlyq júıede kóretin bolady. Bul jóninde «Qazteleradıo» AQ basqarma tóraǵasy Eskendir Tájibekov aıtty.
«Qostanaı oblysynda 59 radıo-televızııa stansasy salyndy. Oblystaǵy tsıfrlyq habar taratý úlesi - 98%. 677 eldimekenniń ishinde nebári 40 aýyl tsıfrlyq júıede teledıdar kóre almaıdy. Munyń ózindik sebepteri bar», - dedi Eskendir Tájibekov.
Basqosýda qala men aýyl turǵyndaryn aqparattandyrý maqsaty sóz boldy. Oblys ákiminiń orynbasary Marat Júndibaevtyń aıtýynsha, 1 shildeden bastap analogty habar taratý toqtatylady.
«Endi shalǵaı aýyldardyń turǵyndary teledıdardy eń joǵary sapada tegin kóre alady. Soǵan baılanysty halyq arasynda aqparat-nasıhattyq jumystar júrgizý qajet. Sebebi, maǵan belgili derekter boıynsha, Lısakov qalasy respondentteriniń 48%-y, Denısov aýdany turǵyndarynyń 48%-y bul jańalyq týraly bilmeıdi. Bul degenińiz - úlken problema. Keıin opyq jeıtin biz bolamyz. Sondyqtan turǵyndardy qazirden bastap qulaqqaǵys etińizder. Muny qadaǵalaýdy ishki saıasat basqarmasyna tapsyramyn», - dedi M.Júndibaev.
Jıyn barysynda Eskendir Tájibekov pen Marat Júndibaev tsıfrly habar taratý júıesi resmı túrde iske qosty.