Qostanaıda tsıfrlandyrýdyń 30 jobasy aýyl sharýashylyǵyna engizildi

QOSTANAI. QazAqparat - Qostanaıda tsıfrlandyrýdyń jol kartasy boıynsha 30 joba aýyl sharýashylyǵy salasyna engizildi. Bul týraly búgin oblys ákimdiginde ótken jıynda belgili boldy, dep habarlaıdy «QazAqparat» HAA tilshisi.

S.Seıfýllın atyndaǵy qazaq agrotehnıkalyq ýnıversıteti» AQ rektory Aqylbek Kúrishbaev bastaǵan bir top astanalyq ǵalymdarmen kezdesken oblys ákimi Arhımed Muhambetov óńirdegi tsıfrlandyrý baǵdarlamasy týraly sóz etti.

«Jańa baǵdarlamany júzege asyrýda bizdiń oblys pılottyq joba retinde tanylǵany belgili. Búginde astyqty aımaqta tsıfrlandyrýdyń jol kartasy túzilip, oǵan 70-ke tarta  joba kiriktirilgen. Sonyń 30-y aýylsharýashylyq salasyna tıesili. «Aqyldy» tehnologııalar et, sút fermalaryna, eginshilik sharýashylyǵyna engiziledi. Egistik alqaptarynyń elektrondy kartasy, jerseriktik GPS navıgatsııasy, avtomattandyrylǵan mal baqylaý qurylǵylary aldaǵy kúnderi úırenshikti qubylysqa aınalady», - dedi óńir basshysy.

Al Aqylbek Kúrishbaevtyń sózinshe, tsıfrly júıeniń agroóndiriske tıgizer septigi zor. Qazirdiń ózinde atalǵan oqý orny egin sharýashylyǵyn sapaly júrgizý jáne topyraqty óńdeý úshin ǵaryshtyq túsirilim júrgizedi. Sonyń nátıjesinde Aqmola oblysyndaǵy alqaptardyń elektrondy kartasy jasaldy.

«Elimizdiń soltústiginde negizgi astyq ósiretin oblystarda agroónerkásip keshenin tsıfrlandyrý jumystary S.Seıfýllın atyndaǵy Qazaq agrotehnıkalyq ýnıversıteti arqyly iske asyrylady. Osy tusta Qostanaı oblysymen tyǵyz áriptestikti kútemiz. Jalpy, biz jańa tehnologııaǵa kóshý arqyly eldiń ekonomıkalyq áleýetin kóterýge yqpal ete alamyz. Ǵylymı tásilderge júginbesek, zamanaýı agrotehnologııalardy qoldanbasaq, álemdik damýdyń kóshine ilese almaı qalýymyz múmkin. Men jaqynda Qytaıda boldym. Ol jaqtaǵy agroónerkásip salasynyń mamandary túgel tsıfrlandyrýǵa kóshken. Endi birigip, osy iske kirissek, kóp nárseden utamyz»,-dep atap kórsetti Aqylbek Kúrishbaev.

Búgingi jıynda aıtylǵandaı, elimizdiń agroónerkásip kesheni jańa ǵylymı jobalarǵa, olardy daıyndaıtyn zamanaýı tásilderdi jetik meńgergen ǵalymdarǵa muqtaj. Keńes sońynda Qostanaı oblysynyń ákimdigi men S.Seıfýllın atyndaǵy Qazaq agrotehnıkalyq ýnıversıteti ózara áriptestik týraly ekijaqty memorandýmǵa qol qoıdy. Qos tarap tsıfrlandyrý máselelerin sheshý maqsatynda kadr daıyndaý jumysyn qolǵa alýǵa ýaǵdalasty.