Qostanaıda Chelıabi oblysynyń mádenı kúnderi ótedi
QOSTANAI. QazAqparat - 2019 jyly Qostanaıda Chelıabi oblysynyń mádenı kúnderi ótedi, dep habarlaıdy QazAqparat oblys ákiminiń baspasóz hatshysy Jiger Sársenge silteme jasap.
Búgin Qostanaı oblysy ákiminiń orynbasary Meıirjan Myrzalıev bastaǵan delegatsııa músheleri Reseı Federatsııasy Chelıabi oblysynyń basshylyǵymen kezdesip, aımaqaralyq áriptestik máselesin talqylady. Taraptar aldymen óńirlerdiń syrtqy ekonomıkalyq áriptestigine basa mán berdi. Atap aıtqanda taýar aınalymyn arttyrý, óndiristik kooperatsııany kúsheıtý, bilim berý men densaýlyq saqtaý, mádenı qarym-qatynas jáne týrızm jaıy jan-jaqty sóz boldy.
Talqylaýǵa túrtki bolǵan taqyryptyń biri - 2019 jyldyń alǵashqy toqsanynda Qostanaıda Chelıabi oblysynyń kúnderin ótkizý. Osy shara aıasynda eki el isker top ókilderiniń áleýmettik-mádenı baılanystaryna jol ashpaq.
«Qostanaı jáne Chelıabi oblystarynyń basshylyǵy qazirden bastap mádenıet kúnderin uıymdastyrý máselelerin qolǵa alý qajettigine kelisti. Taıaý ýaqytta arnaıy jumys toby qurylyp, tıisti is-sharalar jospary naqtylanady. 2017 jyly aımaqtar arasynda Saýda-ekonomıkalyq jáne mádenı áriptestik jónindegi kelisimge qol qoıylǵan bolatyn. Qostanaıda Chelıabi oblysynyń mádenı kúnderin ótkizý - sol qujattyń naqty júzege asyrylýy», - dedi Jiger Sársen.
Oblystar arasynda ózara týrızmdi damytý maqsatynda Chelıabi men Qostanaı oblystarynyń týrıstik uıym ókilderi jáne blogerler úshin qysqy týrıstik baǵyttar boıynsha aqparattyq týr uıymdastyrmaq. Reseılikter atalǵan sharaǵa qarjy bólýge daıyn ekendigin jetkizdi. Al jaz aılarynda balalar men jastar týrızmin damytý maqsatynda aımaqtar úsh kúndik týrıstik baǵyttardy qolǵa alý qajettigine ýaǵdalasty. Ol boıynsha qaýipsizdik pen baǵdarlamanyń mazmundylyǵyna aıryqsha den qoıylady. Budan bólek medıtsınalyq, ańshylyq-oljalyq týrızm baǵyttaryna da basa mán berilip otyr.
Sonymen qatar eki oblystyń ókilderi óndiristik kooperatsııa, ınvestıtsııa tartý jóninde birlesip qolǵa alǵan jobalardy únemi nazarda ustap, aqaparat almasyp otyrýǵa kelisti.
Kezdesý sońynda 2020 jyly Chelıabi qalasynda ótetin Shanhaı Yntymaqtastyq Uıymy (ShYU) men BRIKS sammıtteri de sóz boldy. Reseılik tarap Qostanaı oblysyn osy jyldyń 4-6 jeltoqsan kúnderi Chelıabide ótkiziletin ShYU aıasyndaǵy forýmǵa qatysýǵa shaqyrdy.
Eske salsaq, búgin Qostanaı oblysynyń ákimdigi Reseıdiń Chelıabi oblysyna jumys saparymen barǵan bolatyn.
