Qostanaıda Chelıabi oblysynyń kúnderi bastaldy
QOSTANAI. QazAqparat – Búgin Chelıabi oblysynyń kúnderi aıasynda Qostanaı qalasyna jumys saparymen Chelıabi oblysynyń gýbernatory Alekseı Teksler bastaǵan delegeatsııa keldi, dep habarlaıdy QazAqparat.
Meımandar qatarynda birqatar mınıstrlik men kompanııalar ókilderi bar. Qostanaı oblysynyń ákimi Arhımed Muhambetov atap ótkendeı, bul sapardyń maqsaty – qos eldiń ekonomıkalyq jaǵdaıyn damytý, týrızm-mádenıet salasyndaǵy baılanysty nyǵaıtý.
«16 jyl boıy Reseı Federatsııasy men Qazaqstan Respýblıkasynyń shekaralyq yntymaqtastyq forýmy ótkizilip keledi. Qos el arasyndaǵy qatynastyń mańyzdylyǵyn Qazaqstan Prezıdenti Qasym-Jomart Toqaev alǵashqy sheteldik saparynda atap ótti. Biz árýaqytta Chelıabidegi áriptesterimizdiń shaqyrýyn qabyldaımyz. Bul joly kórshiles oblys ókilderi bizdiń óńirge kontserttik baǵdarlamamen keldi», — dedi Arhımed Muhambetov.
Sapar barysynda Chelıabi delegatsııasy áleýmettik jáne óndiristik nysandardy aralap, memlekettik organdar men bıznes-qaýymdastyqtardyń qatysýymen kezdesý ótkizdi. Qos oblystyń jetekshi kásiporyndary, ulttyq kompanııalary, atqarýshy bılik organdary arasynda yntymaqtastyq týraly memorandýmdarǵa qol qoıyldy.
Ońtústik-oral óńiriniń «Ýral» memlekettik bı jáne án ansambli «Jastar saraıynda» kontserttik baǵdarlama qoıdy.
