Qostanaıda bıýdjet qarajatyn jymqyrǵan memqyzmetshi ustaldy

QOSTANAI. QazAqparat - Qostanaıda memlekettik qyzmetshilerdi qaıta daıarlaý jáne olardyń biliktiligin arttyrý óńirlik ortalyǵy dırektorynyń orynbasary 9 mln teńgeden qarajatty óziniń jeke esep kartasyna aýdaryp kelgen, dep habarlaıdy «Qazaqparat» HAA Qostanaı oblystyq sotynyń baspasóz qyzmetine silteme jasap.

Іs derekterinde kórsetilgendeı, atalǵan ortalyq dırektorynyń orynbasary 2017 jyldan bastap mekemeniń qarjy-sharýashylyq operatsııalaryn ózi júzege asyryp kelgen. Nátıjesinde oqytýshylarǵa berilýi tıis bolǵan 9 mln teńgeden astam somany óziniń jeke esep kartasyna aýdarǵan. Keıin bul qarajatty óz qalaýy boıynsha jumsap otyrǵan.

Eks-qyzmetker tóleý qaǵazyna jalǵan málimetterdi, atap aıtqanda, oqytýshylardyń jeke qujattaryn ózgertip, óziniń kart-shotynyń nómirin kórsetken.

Bıýdjet qarajatyn jymqyrǵan áıel Qostanaı qalasynyń № 2 sotynyń úkimimen kináli dep tanyldy. Oǵan 3 jyl 6 aı merzimge bas bostandyǵyn shekteý jazasy taǵaıyndaldy. Osy ýaqyt aralyǵynda probatsııalyq baqylaý ornatyldy.