Qostanaıda bıýdjet qarajatyna salynǵan 65 úı áli satylmaı tur
ASTANA. KAZINFORM — Qostanaıdaǵy Qunaı turǵyn alabynda jeke turǵyn úı qurylysyna arnalǵan jer ýchaskelerin bólý jumystary jalǵasyp jatyr. Jer berý týraly júzdegen qaýly qabyldanǵanymen, ázirshe tek bir úı ǵana paıdalanýǵa berilgen. Al bıýdjet qarajatyna salynǵan 124 daıyn úıdiń jartysynan azy satylǵan.
Qostanaı ákimdiginiń jer qatynastary bóliminiń málimetinshe, búginge deıin kezekte turǵan azamattarǵa jer ýchaskelerin berý týraly 724 qaýly qabyldanǵan. Onyń ishinde azamattar 274 sáýlet-josparlaý tapsyrmasyn alǵan, taǵy 132 ýchaskede bolashaq úılerdiń eskızdik jobalary kelisilgen.
Al qurylys jumystaryna 24 jer paıdalanýshy ǵana kirisken. Ázirshe paıdalanýǵa berilgen turǵyn úı sany — bireý.
Ákimdik ókilderiniń aıtýynsha, jer berilgennen keıin mamandar jaldaý merzimi aıaqtalǵansha qurylys barysyn baqylap otyrady. Bul jumys SmartQostanai tsıfrlyq servısi arqyly da júrgiziledi.
Kelisimshart talaptaryna sáıkes, jer ýchaskesiniń ıeleri alty aı ishinde qurylys alańyn qorshap, eskızdik jobany kelisýge mindetti. Al turǵyn úı qurylysyn tolyq aıaqtaýǵa úsh jyl ýaqyt beriledi.
Jer ýchaskesin jeke menshikke rásimdeý úshin úıdi paıdalanýǵa berý qajet. Eger ýchaske ıgerilmese nemese nysanaly maqsatyna saı paıdalanylmasa, ákimdik jaldaý shartyn buzý úshin sotqa júgine alady.
Sonymen qatar Qunaıda bıýdjet qarajatyna salynǵan daıyn jeke turǵyn úılerdi satý jalǵasyp jatyr. 2025 jyly jalpy 124 bir jáne eki qabatty úı paıdalanýǵa berilgen.
Jer qatynastary bóliminiń málimetinshe, 2026 jyldyń basynan beri mundaı baspana satyp alýǵa 500-den astam áleýetti satyp alýshy ótinish bildirgen. Alaıda olardyń kóbi nesıe alý úshin bankter qoıǵan talaptarǵa sáıkes kelmeıdi.
Ákimdik ókilderi satyp alýshylardy naryqtaǵy ortasha baǵadan tómen baǵaǵa jer ýchaskesimen birge úı satyp alý múmkindigi qyzyqtyratynyn atap ótti.
Qala turǵyndarynyń qyzyǵýshylyǵyna qaramastan, búginge deıin 59 úı ǵana satylǵan. Demek, áli 65 úı óz satyp alýshysyn tapqan joq. Ákimdiktiń túsindirýinshe, bul baspanalardy satýǵa arnalǵan arnaıy baǵdarlama joq. Úıdi qolma-qol aqshaǵa nemese bank nesıesi arqyly satyp alýǵa bolady.
Eske salaıyq, buǵan deıin Qostanaı qalasynda jeke turǵyn úı salý úshin tegin jer telimin alýǵa shamamen 50 myń adam kezekte turǵanyn habarlaǵan edik.