Qostanaıda burynǵy shuǵa-jún ıirý zaýyty órtendi
QOSTANAI. QazAqparat - Qostanaıdyń KSK shaǵyn aýdanyndaǵy burynǵy shuǵa-jún ıirý zaýyty órtke orandy, dep habarlaıdy QazAqparat tilshisi oblystyq TJD baspasóz qyzmetine siltememen.
Oqıǵa 11 qazan kúni bolǵan. Oblystyq TJD kezekshi bólimine saǵat 19.02 kezinde habarlama kelip túsedi. Arnaıy órt sóndirý bóliminiń 6 órt sóndirýshisi men 2 tehnıkasy jumyldyryldy.
«Bos turǵan burynǵy shuǵa-jún ıirý zaýytyndaǵy qurylys materıaldarynyń qaldyǵy tutanǵan. Órt aýmaǵy 150 sharshy metrdi quraıdy. Ǵımarat janyndaǵy 3 qabatty jataqhanadaǵy 210 adam qutqaryldy. Onyń 40-y - balalar», - dep habarlady oblystyq TJD baspasóz qyzmeti.
Sol mezette órt oryn alǵan jerge polıtseıler de kelip jetken. Qyzyl jalyn 21.04-te aýyzdyqtaldy.
