Qostanaıda burynǵy áıelin qyzǵanyshtan atyp óltirgen er adam 12 jylǵa sottaldy
ASTANA. KAZINFORM — Qostanaı qalasynyń turǵyny burynǵy áıelin ańshylyq karabınmen atyp óltirgeni úshin 12 jylǵa bas bostandyǵynan aıyryldy.
Qylmystyq ister jónindegi mamandandyrylǵan aýdanaralyq sottyń málimetinshe, oqıǵa 2026 jylǵy naýryzda bolǵan. Er adam burynǵy jubaıymen qyzǵanyshtan týyndaǵan janjal kezinde ony óltirý maqsatynda ańshylyq karabınnen eki ret oq atqan. Oq áıeldiń basy men keýde tusyna tıgen. Ol alǵan jaraqattarynan oqıǵa ornynda qaıtys boldy.
Oqıǵadan keıin sottalýshy qylmys ornynan ketip qalǵan. Keıin polıtsııaǵa óz erkimen baryp, kinásin moıyndaǵan.
Sotta prokýror oǵan 14 jylǵa bas bostandyǵynan aıyrý jazasyn taǵaıyndaýdy surady. Al jábirlenýshi tarap eń joǵary jaza berýdi ótindi.
Sottalýshy kinásin moıyndap, jasaǵan isine ókinetinin aıtty. Bul jaǵdaılar jazany jeńildetetin mán-jaılar retinde eskerildi. Aýyrlatatyn mán-jaılar anyqtalǵan joq.
— Sot er adamdy adam óltirgeni úshin kináli dep tanyp, 12 jylǵa bas bostandyǵynan aıyrý jazasyn taǵaıyndady. Ol jazasyn ortasha qaýipsizdik deńgeıindegi qylmystyq-atqarý júıesi mekemesinde óteıdi. Sonymen qatar sot jábirlenýshi taraptyń azamattyq talabyn ishinara qanaǵattandyryp, moraldyq zııandy óteý týraly sheshim shyǵardy. Úkim ázirge zańdy kúshine engen joq, — delingen sot taratqan habarlamada.
Buǵan deıin BQO-da ańshylyq kezinde aýyldasyn atyp óltirgen turǵynǵa úkim shyqqanyn jazǵan edik.
