Qostanaıda brakonerdiń kóligi tárkilenip, 14 mln teńge aıyppul salyndy
QOSTANAI. QazAqparat - Qostanaıda zańsyz kıik atqan turǵyn qamaýǵa alyndy, dep habarlaıdy QazAqparat oblystyq sottyń baspasóz qyzmetine silteme jasap.
Brakonerler Jangeldın aýdanynyń Borly eldi mekeninde 3,5-5 jyldyq 4 kıikti zańsyz atqan. Olar óltirilgen janýarlardyń múıizderin (derıvattaryn) kesip alǵan.
«Jangeldın aýdandyq sotymen qylmystyq is kelisimdi is júrgizýde qaraldy. Ol boıynsha azamat J. QR QK-niń 337, 339-baptary boıynsha kináli dep tanyldy. Jaza óteýdiń barlyq merzimine probatsııalyq baqylaý belgilenip, jyl saıyn 100 saǵatqa jergilikti atqarýshy organmen belgilengen oryndarda májbúrli eńbekke tartylady.Ańshylyq qyzmetpen aınalysý quqyǵynan 3 jyl merzimge aıyra otyryp, oǵan 2 jyl 6 aı bas bostandyǵyn shekteý jazasy taǵaıyndaldy. Jaza taǵaıyndaý kezinde sot J.-nyń asyraýynda tórt jas balanyń bolýy, sondaı-aq buryn sottalmaǵanyn eskerdi», - delingen baspasóz habarlamasynda.
Buǵan qosa, sottalýshy QR janýarlar dúnıesin qorǵaý, ósimin molaıtý jáne paıdalaný salasyndaǵy zańnamany buzǵany úshin memleket paıdasyna 14 430 000 teńge aıyppul tóledi.
Sot úkimimen qylmystyq is boıynsha «Toyota 4runner» markaly avtokólik memleket kirisine tárkilendi. Al «IJ-18E» modeldi 12 kalıbrli tegis uńǵyly ańshy myltyǵyn joıý sheshimi qabyldandy.
Oblystyq sottyń baspasóz qyzmeti el aýmaǵynda kıikterdi, olardyń bólikteri men derıvattaryn paıdalanýǵa 2020 jylǵa deıin tyıym salý engizilgenin eske salady.
