Qostanaıda bir táýlikte aılyq jaýyn-shashyn mólsheri tústi
ASTANA. KAZINFORM — Qostanaıda 9 maýsym men 10 maýsymǵa qaraǵan túni 37,5 mm jaýyn-shashyn tústi. Bul maýsym aıyndaǵy ortasha aılyq normanyń 101,3%-yn quraıdy, dep habarlady Kazinform agenttiginiń tilshisi.
Qala ákimdigi atap ótkendeı, bir kúnde rekordtyq kólemde jaýyn jaýǵanyna qaramastan, sý burý júıesi júktemeni eńsergen.
Bılik málimetinshe, aılyq jaýyn-shashyn mólsheri is júzinde bir táýlikke jetpeıtin ýaqytta túsken. Nóser jańbyr saldarynan qalanyń keıbir bólikterinde ýaqytsha sý jınalǵan kórinedi.
Áleýmettik jelilerde turǵyndar aýa raıynyń kúrt buzylǵan sátterinen túsirilgen beınejazbalardy jarııalady.
Sý basqan kóshelerden kólik júrgizýshileri de zardap shekti — kóptegen avtokólik ıeleri memlekettik tirkeý nómirlerinen aıyrylǵan.
Oblystyń keıbir aýdandarynda burshaq jaýǵan. Áleýmettik jelilerde aýyl turǵyndary jaýyn-shashynnyń egistik alqaptarǵa zııan keltirgenin jazyp jatyr.
Qaladaǵy nóser káriz júıesiniń jalpy uzyndyǵy 110 shaqyrymdy quraıdy. Budan bólek, Qostanaıda 18 shaqyrym sý burý arnalary men sý ótkizý qurylystarymen jabdyqtalǵan 15,7 shaqyrym saı júıesi bar. Qazirgi ýaqytta joldar men aýlalarda sý jınalý faktileri tirkelmegen.
Ákimdik sońǵy úsh jylda qalada sý burý ınfraqurylymyn damytý boıynsha júıeli jumystar júrgizilgenin atap ótti. Osy kezeńde shamamen 22 shaqyrym nóser káriz jelisi salynǵan.
Eń mańyzdy jobalardyń qatarynda Qostanaı-2 shaǵynaýdany men Nazarbaev dańǵylyndaǵy jol ótkeli ataldy. Buryn bul aýmaqtarda qatty jaýyn-shashyn men sý tasqyny kezinde turaqty túrde sý basý jaǵdaılary oryn alatyn.
Eske salaıyq, buǵan deıin Aqtóbede nóser jaýynnan soń 100-den astam assenızator táýliktik kezekshilikke shyǵarylǵany belgili boldy.
