Qostanaıda Botaı mádenıetiniń murasy tanystyryldy
ASTANA. KAZINFORM - Qostanaı qalasynyń 147 jyldyǵyna arnalǵan merekelik is-sharalar aıasynda «Botaı – Uly Dala mádenıeti» atty kóshpeli kórme ótti, dep habarlaıdy QR Mádenıet jáne aqparat mınıstrliginiń baspasóz qyzmeti.
Ekspozıtsııaǵa tastan, súıekten jáne qyshtan jasalǵan 139 arheologııalyq jádiger qoıyldy. Sondaı-aq kelýshiler nazaryna taqyryptyq kórkem týyndylar men ejelgi qonystyń maketi usynyldy.
Kórme qonaqtary eneolıt dáýirindegi turǵyndardyń turmys-tirshiligimen, qolónerimen jáne mádenıetimen tanysyp, jylqyny qolǵa úıretý tarıhy týraly mol maǵlumat aldy.
Arheologııalyq materıaldar Botaı mádenıetiniń Uly Dala tarıhyndaǵy orny men mańyzyn tereńirek tanytýǵa múmkindik berdi. Kórmeni ejelgi mádenıetterdi zerttep júrgen sheteldik mamandar da tamashalady.
Baǵdarlama aıasynda Qazaqstan tarıhy men arheologııalyq murasyna arnalǵan sheberlik sabaqtary, tanymdyq jáne mádenı is-sharalar uıymdastyryldy.
Osyǵan deıin SQO-da Botaı mádenıetine arnalǵan kórkem fılm túsirilip jatqany týraly jazdyq.
