Qostanaıda boran: Polıtseıler kólik júrgizýshilerine bir táýlikte 16 ret kómektesti
QOSTANAI.QazAqparat – Kesheli beri Qostanaı oblysynda boran turyp, kóktaıǵaq bolyp jatyr. Aýa raıynyń qolaısyzdyǵyna baılanysty jol saqshylarynyń sany kóbeıtildi. Jol polıtsııasy qyzmetkerleri bir táýlik ishinde qıyn jaǵdaıda qalǵan 16 kólik júrgizýshige kómek kórsetti, dep habarlaıdy QazAqparat oblystyq jol polıtsııasy baspasóz qyzmetine silteme jasap.
Búgin, tańerteń 156-quramdaǵy polıtsııa leıtenanty AbylaıhanTájıev pen aǵa serjant Jánibek Birkemelov Almaty-Ekaterınbýrg tasjolynda shuńqyrǵa túsip ketken avtokólikti shyǵardy. Keıinirek kezekshilik bólimge Gaıda Jandarbekova, Aıgúl Ahmetova jáne Gúlbaný Malgeldına esimdi azamatshalar habarlasyp, kórsetken kómekterine alǵys bildirgen. «Biz jolda ketip bara jatqanbyz. Kólik joldan shyǵyp ketip, shuńqyrǵa qulady. Jol boıyndaǵy polıtsııa qyzmetkerleri bizge kómektesip, kólikti shuńqyrdan shyǵaryp, eshkim zardap shekpedi me dep surady. Biz alǵys hat jazǵymyz keletinin aıtqanda olar esimderin aıtýdan bas tartty. Bul bizdiń jumysymyz dedi. Biraq biz jol saqshylarynyń kólik nómirin este saqtap qaldyq», deıdi Gaıda Jandarbekova. «Úlken alǵys aıtqymyz keledi, óıtkeni adam qıyndyqqa tap bolǵanda kómektiń der kezinde kelýi óte mańyzdy», dep atap ótti Gúlbaný Malgeldına.
Oblysta búgin de aýa raıy qolaısyz bolyp tur. Polıtsııa qyzmetkerleri júrgizýshilerge alys saparǵa shyqpaýdy suraıdy.
