Qostanaıda bolashaq medqyzmetkerlerge arnalǵan Stýdentter úıi ashyldy

QOSTANAI.QazAqparat – Arhımed Muhambetov Qostanaı joǵary medıtsınalyq kolledji stýdentteri jataqhanasynyń ashylý rásimine qatysty, dep habarlaıdy QazAqparat oblys ákiminiń baspasóz qyzmetine silteme jasap.

1500-ge jýyq stýdent bilim alatyn Qostanaı joǵary medıtsınalyq kolledjine jataqhananyń qajettiligi týraly másele kóterilip kelgen edi. Jańa jyl merekesi qarsańynda oqý orny Stýdentter úıin paıdalanýǵa berip otyr. Qazir munda shákirtterdi bes mamandyq, segiz deńgeı boıynsha oqytady. Jataqhananyń ashylý saltanatyna qatysqan óńir basshysy Arhımed Muhambetov bul nysannyń Elbasynyń tikeleı tapsyrmasymen boı kóterip otyrǵanyn aıtty.

«Jańa jyl qarsańynda kolledj stýdentteri óz baspanasyna kóshýge múmkindik aldy. 250 orynǵa arnalǵan jataqhanaǵa eń aldymen kóp balaly otbasylardan, jetim balalar, І jáne ІІ toptaǵy jáne kámeletke tolmaǵandar ornalastyrylady. Aýyldyq jerlerden jáne ózge oblystardan kelgen stýdentterge arnaıy oryndar qarastyrylǵan. Nysannyń búgingi jaǵdaıymen tanysyp shyqtym, qurylys jumystary sapaly oryndalǵan. Qonystanyp jatqan shákirttermen jolyqtym. Jataqhana zamanaýı jabdyqtarmen, as úı, oqý zaly, jýyný bólmelerimen jaraqtalǵan. Qaýipsizdik jaǵy erekshe qadaǵalaýda. Buǵan deıin páter jaldap kelgen shákirtter endi munda tegin turady. Eń bastysy, jataqhana kolledj ǵımaratynyń dál qasynda ornalasqan», — dedi A.Muhambetov.

Aımaq basshysy atap ótkendeı, bıyl Qostanaı avtomobıl kóligi kolledjiniń janynan 500 oryndyq jataqhana qurylysy bastaldy. Sonymen qatar Qostanaı joǵary polıtehnıkalyq kolledji janynan 500 orynǵa arnalǵan jataqhana paıdalanýǵa beriledi.