Qostanaıda boks mektebi ashyldy
QOSTANAI.QazAqparat – Qostanaı qalasyndaǵy mamandandyrylǵan boks mektebiniń ashylýyna oblys ákimi Arhımed Muhambetov qatysty, dep habarlaıdy QazAqparat tilshisi.
Boks mektebiniń qurylysy «Jumyspen qamtýdyń jol kartasy-2020» memlekettik baǵdarlamasy aıasynda júrgizildi. Sport ǵımaratyna zamanaýı jabdyqtar ákelingen. Negizgi jattyǵý zalynan tys birneshe jarys alańdary bar. Keshenniń qurylysy 2018 jyly bastalǵan.
Qostanaı oblysynyń ákimi atalǵan nysannyń oblys sportshylaryn daıarlaýdaǵy, sonyń ishinde balalar men jasóspirimder sportyn damytýdaǵy mańyzyn atap ótti.
«Qostanaı oblysyndaǵy boks mektebiniń dástúri qaıta jańǵyrýda. Onyń negizin qalaǵan Erık Hakımov, Aleksandr Mıroshnıchenko, Berik Jamanqulov, Ivan Dychko jáne Vasılıı Levıt sııaqty ataqty sportshylardyń izin jalǵaıtyn jas órender shyǵatynyna senemin. Qazaqstan Respýblıkasynyń Táýelsizdik kúni qarsańynda ashylǵan mamandandyrylǵan boks mektebi, sózsiz, chempıondardyń jańa býynyn tárbıeleıdi. Ámbebap boks zalynda 200-den astam jasóspirim sportpen aınalysa alady», - dedi Arhımed Muhambetov ashylý rásiminde.
Boks mektebiniń ashylýyna bokstan QR Chempıonatynyń jeńimpazdary – Nadejda Rıabets, Vladıslav Kýhta jáne Janna Serikovalar qatysty.
Aımaq basshysy sportshylarǵa estelik syılyqtar tabystady, al Nadejda Rıabets Arhımed Muhambetovtiń qolynan 2 bólmeli páterdiń sertıfıkatyn aldy. QR chempıonyna páter Qostanaı qalasynan berilmek. Esterińizge sala keteıik, osy jyldyń naýryz aıynda Nadejda Rıabets Tokıoda ótetin Olımpıada oıyndaryna lıtsenzııa jeńip aldy. Endi ol áıelder boksynda el namysyn qorǵaıtyn bolady.
Aıta keteıik, boks mektebimen qatar, jaqyn arada oblys ortalyǵynda shańǵy bazasy iske qosylady, al kelesi jyly 2500 oryndyq Muz saraıy men 50 metrlik júzý basseıni paıdalanýǵa beriledi.
