Qostanaıda bilim berý bóliminiń basshysy bıýdjet qarjysyn jymqyrdy degen kúdikpen ustaldy
ASTANA.KAZINFORM — Qala mektepterine bólingen qarajattyń jymqyrylýyna baılanysty qylmystyq is tergelip jatyr.
Qostanaı oblysy boıynsha UQKD habarlaýynsha, Qostanaı qalasy bilim bóliminiń laýazymdy tulǵalaryna qatysty is boıynsha sotqa deıingi tergeý júrip jatyr. Tergeý dereginshe, qazyna aqshasyn bir top adam úptegen.
1 maýsym kúni tergeý aıasynda birqatar tergeý is-sharasy atqaryldy. Laýazymdy tulǵalardyń turǵylyqty jeri men jumys ornynda tintý júrgizildi.
Dál osy kúni QR QK 190-baby 3-bóliminde kózdelgen qylmystyq quqyqbuzýshylyqty istedi degen kúdikpen Qostanaı qalasy bilim bóliminiń basshysy Gúlsim Orazbaeva ustaldy.
Vedomstvonyń málimdeýinshe, tergeý jalǵasyp jatyr. QR Qylmystyq-protsestik kodeksi 201-babyna sáıkes, ózge aqparat jarııa etilmeıdi.
Aıta keteıik, buǵan deıin Shymkentte kolledj basshylary men býhgalterler 1,3 mlrd bıýdjet qarajatyn jymqyrǵanyn jazǵanbyz.
