Qostanaıda bıznesti qoldaýǵa 10 mlrd teńge bólindi
QOSTANAI. QazAqparat - Bıyl Qostanaı oblysynda shaǵyn jáne orta bıznesti (ShOB) qoldaýǵa 10 mlrd teńgeden astam qarjy bólindi. Bul týraly Arqalyq qalasynda ótken jıynda oblys ákiminiń orynbasary Meıirjan Myrzalıev málim etti, dep habarlaıdy QazAqparat.
Qostanaı oblysynda bıznesti damytýǵa baǵyttalǵan memlekettik qoldaýdyń barlyq sharalary iske asyp jatyr. Sonyń biri - «Bıznestiń jol kartasy 2020» baǵdarlamasy. Atalǵan membaǵdarlamany damytý úshin bıyl 5,5 mlrd teńgeden astam qarajat bólindi.
«Kásipkerlikti qoldaýdyń qabyldanǵan sharalary arqasynda sońǵy 4 jylda oblysta shaǵyn jáne orta bıznestiń ónimi 50%-ǵa ósti. Shaǵyn jáne orta bızneste jumys isteıtin adamdardyń sany 2014 jyly 138 myń bolsa, byltyr ol 152 myńǵa deıin artty. Bul kórsetkish boıynsha Qostanaı oblysy barlyq oblystar men respýblıkalyq mańyzy bar qalalardyń ishinde 4-orynda. Bıyldyń ózinde ShOB qoldaýǵa 10 mlrd teńgeden astam qarjy bólindi», - dedi oblys ákiminiń orynbasary Meıirjan Myrzalıev.
M.Myrzalıevtiń aıtýynsha, ShOB salasyndaǵy nátıjeler, eń aldymen, oblystyń ońtústik óńirleri - Arqalyq, Amangeldi, Jangeldi jáne Naýyrzym aýdandaryndaǵy kásipkerlikti damytýǵa aıryqsha yqpal etýde.
«Qazirgi ýaqytta ońtústik aýdandardyń kásipkerlerdi memlekettk baǵdarlamalardy durys paıdalanyp keledi. 2018 jyly bıznesti damytý baǵdarlamasy sheńberinde 239,2 mln teńge somasynda 75 shaǵyn nesıe alyndy. Sonymen qatar, «Damý» kásipkerlikti damytý qoryn ońtústik óńirlerge 6,7 mln teńge bolatyn 2 nesıe berdi», - deıdi oblys ákiminiń orynbasary.
Jıynda aıtylǵandaı,týrızm salasy kásipkerliktiń damýyna úlken serpin bere alady. Búgingi kúni týrızm oblystyń ońtústik aýdandarynyń ekonomıkasyn damytýdyń basty balamasy retinde qarastyrylady. Arqalyq qalasymen Amangeldi, Naýyrzym, Jankeldın aýdandarynda mádenı-tanymdyq, ekologııalyq týrızmdi, ásirese ańshylyq pen balyq aýlaýdy damytýdyń barlyq alǵysharttary bar.
Óńirde 13 ańshylyq isin paıdalanýshy jáne 9 balyq toǵandaryn paıdalanýshy jumys isteıdi.
Eske salsaq, búgin Qostanaı oblysynyń ákimi Arhımed Muhambetov jumys saparymen Arqalyq qalasyna bardy.
Arhımed Muhambetov qalanyń ındýstrııalyq-agrarlyq baǵytyna jaqsy baǵasyn berdi. Degenmen, óńir basshysy jekeleı kórsetkishter boıynsha basshylardyń jumysyn synǵa alǵan bolatyn.
