Qostanaıda birneshe jol men aýdandardy sý basty
QOSTANAI. QazAqparat - Búgin Qostanaıda birneshe jol men aýdandardy sý basty, dep habarlaıdy «QazAqparat» HAA tilshisi.
Mamandar tańerteńnen beri áýejaıǵa baratyn joldaǵy sýlardy aıdaýmen aınalysýda. Erigen qar sýy temirjol kópiriniń astyndaǵy joldy basyp qaldy. Sý mólsheriniń kóp bolǵany sonshalyq, joldy jabýǵa týra kelgen. Dál osyndaı jaǵdaı Qarbyshev-Máýlenov kóshelerindegi kópirdiń astynda oryn aldy.
Batys móltekaýdanyndaǵy tek kólik júretin aýmaqty emes, jaıaý joldy da sý shaıyp ketken. Avtokólik ıeleri men qoǵamdyq kólik jolaýshylaryna qıyndyq týdyrýda. Qala mańyndaǵy «Tekstılşık» baqsha qoǵamyndaǵy birneshe úılerdegi adamdar evakýatsııalandy. Qutqarýshylar men kommýnaldyq qyzmet ókilderi Qostanaıdaǵy Dostyq kentindegi tasyǵan sýdy aıdaýmen aınalysty.
Erteńnen bastap Qostanaı oblysynda aýa temperatýrasy kúrt joǵarylaıdy. Sınoptıkter oblystyń ońtústiginde 20 gradýsqa deıin kún jylynyp, oblys ortalyǵynda - 15 gradýsqa deıin kóteriledi dep boljaýda. Apta sońynda jaýyn-shashyn bolyp, aýa temperatýrasy azdap tómendeıdi. Biraq bul aýa raıyna antıtsıklon áser etip, 20 gradýsqa deıin jylynady.
