Qostanaıda birneshe eldi mekenniń ataýy ózgerýi múmkin
QOSTANAI. QazAqparat - Qostanaı oblysynyń ortalyǵynda jer-sý ataýlaryn ózgertýge baılanysty keńeıtilgen jıyn ótti, dep habarlaıdy QazAqparat tilshisi.
Elimizde kóshe, jer-sý ataýlaryn qazaqylandarý ýaqyt ótken saıyn birtindep sheshimin tabýda. Keńestik zamanda oryssha ataýlarǵa ıe bolǵan eldi-mekenderdiń ataýlary búginde buqaralyq sıpat alyp, halyqtyń bastamasymen ózgeriske ushyrap jatyr. Al 2013 jyly «QR onomastıka týraly» zańyna birqatar ózgertýler men toltyqtyrýlardyń engizilýi osy máselege aıtarlyqtaı serpin berdi.
Basqosýda ár óńirden kelgen ǵalymdar men ólketanýshylar elimizdegi onomastıkanyń ózekti máselelerin kóterip, keleli oılaryn ortaǵa saldy.
«Qostanaı oblysynda jer-sý ataýlaryn ózgertý boıynsha atqarylatyn jumystardy jandandyrý qolǵa alyndy. Memleket basshysynyń 2017 jylǵy 28 aqpandaǵy tapsyrmasyna sáıkes, eldi-mekenderdiń tarıhı ataýlaryn qaıtarý máselelerine nazar aýdaryp otyrmyz. Osyǵan baılanysty arnaıy komıssııa quryldy. Olar óńirdiń barlyq aýdan-qalalaryna baryp, jurtshylyqpen kezdesedi», - dedi oblystyq tilderdi damytý basqarmasynyń basshysy Gúljan Meńdekınova.
Onomastıka salasynda Tobyl óńirinde aýqymdy is tyndyrylyp keledi. Bıyl oblys ortalyǵyndaǵy Taran, Gertsen kósheleriniń ataýlary, tıisinshe Táýelsizdik jáne Qobylandy batyr bolyp ózgerdi. Sol sııaqty Qostanaı jáne Uzynkól aýdandarynyń ortalyq kósheleri Táýelsizdik, Dármenov, Jańbyrshın atandy.
Endi qarasha aıynda 49 eldi meken men kóshelerdiń ataýyn ózgertýge qatysty jeti aýdanda jıyn ótedi. Jergilikti turǵyndar kelisse, jańa ataýlar respýblıkalyq komıssııanyń talqylaýyna jiberiledi. Qazirdiń ózinde bastamashyl top Pavlovka Svıatoslavka, Verenka, Novopavlovka atty eldi mekenderdiń ataýlaryn aýystyrý týraly usynys aıtýda.
«Rasynda Qostanaı óńiriniń keı kóshelerinen bastap, iri-iri aýdandaryna deıin onomastıkalyq saraptaý, eksheý jumystary kútip tur. Bul - ýaqyt talaby. Tarıhı ádiletsizdikterdiń kesirinen talaı arda tulǵalarymyz umyt bolyp barady. Osy olqylyqtyń ornyn toltyrar ýaqyt jetti», - dedi Sh.Ýálıhanov atyndaǵy QMÝ dotsenti Sábıt Jambek.
