Qostanaıda birneshe aýyl biriktirilýi múmkin
QOSTANAI. QazAqparat - Qostanaı oblysynda aýyldyq okrýgterdi ońtaılandyrý úshin biriktirý jumystary júrgizilýi múmkin. Bul bıýdjettiń derbes deńgeıine kóshý kezinde olardyń qyzmetiniń tıimdiligin arttyrýǵa baılanysty, dep habarlaıdy QazAqparat oblystyq qarjy basqarmasynyń basshysy Alma Júsipovaǵa silteme jasap.
2018 jyly jergilikti ózin-ózi basqarý bıýdjetterine 1,3 mlrd teńge tabys túsken. Alma Júsipova atap ótkendeı, onyń ishinde jeke tabys salyǵy - 45,6% jáne kólik salyǵy 45,8%-dy quraıdy.
«Aýyldyq okrýgterde ákimshilik aıyppuldardy jınaý boıynsha jumystar áli de jetkiliksiz deńgeıde júrgizilýde. 2018 jyly osy baǵyttaǵy túsimder 3 aýyldan 469 myń teńge ǵana boldy. Atap aıtqanda, bıýdjetke Meńdiqara aýdanynyń Pervomaı aýyldyq okrýgi jáne Rýdnyıdaǵy Qashar jáne Zatobol kentteri túsip jasady. Qazirgi ýaqytta aıyppuldyń 18 túri bar ekenin atap ótý kerek», - dedi ol.
Alma Júsipovanyń sózinshe, bıýdjettiń derbes deńgeıin kedergisiz engizý úshin aýyldyq okrýg ákimderi apparattarynda barlyq jaǵdaı jasalǵan. Jergilikti ózin-ózi basqarýǵa kóshken 45 aýyldyq okrýg qarjylandyrylýmen, avtokólik quraldarymen, kompıýterlik jabdyqtarmen, baǵdarlamalyq ónimdermen qamtamasyz etilgen, jyldam ınternetke qosylǵan.
«2020 jyldyń 1 qańtarynan bastap barlyq aýyldyq okrýgter bıýdjettik úderisti jáne kommýnaldyq menshikti derbes basqarýǵa kóshedi. Sondyqtan qyzmet tıimdiligin arttyrý maqsatynda aýyldyq okrýgterdi biriktirý jolymen ońtaılandyrý múmkindigin qarastyrý qajet dep sanaımyn», - dep usynys jasady qarjy basqarmasynyń basshysy oblys ákimine.
Mysaly, Qostanaı aýdanynyń I. F. Pavlov atyndaǵy aýyldy taratý usynyldy. Onda 494 adam turady. Ákimdikte 6 adam jumys isteıdi jáne jeke apparaty bar. Endi osy aýyldy 6 shaqyrym qashyq ornalasqan Aleksandrovka aýylyna qosý qajettiligi aıtyldy. Atalǵan aýylda 1723 adam turady.
«Ákimshilik-aýmaqtyq birlikterdi ońtaılandyrý ákimshilik shyǵystardy qysqartýǵa ǵana emes, sondaı-aq aýyldyq deńgeıde derbes bıýdjetti neǵurlym tıimdi engizýge múmkindik beredi. Bul jumys Qarasý aýdanynyń ákimdigi júrgizildi, nátıjesinde 6 aýyldyq okrýg taratylyp, 17 shtattyq birlik bosady. Nátıjesinde jyl saıynǵy únemdeý somasy 50 mln teńgeden asty. Osyndaı jumystar Arqalyq qalasynda da júrgizilýde», - dedi Alma Júsipova.
