Qostanaıda birqatar aýyldyń joldary jóndeledi

QOSTANAI. QazAqparat - 2019-2021 jyldary Qostanaı oblysyna respýblıkalyq bıýdjetten qosymsha 80 mlrd teńge bólinedi. Bul týraly oblys ákimi Arhımed Muhambetovtiń qatysýymen ótken oblystyq máslıhattyń kezekten tys sessııasynda belgili boldy, dep habarlaıdy QazAqparat tilshisi.

El qazynasynan bólinetin qarjynyń basym bóligi oblystyq jáne aýdandyq mańyzdaǵy joldardy jóndeýge baǵyttalady. Sondaı-aq joldardy jańǵyrtýǵa jergilikti bıýdjetten qosymsha qarjy bólinedi. Oblys ákimdiginiń ekonomıka jáne bıýdjettik josparlaý basqarmasynyń basshysy Gúlbaram Musaǵazınanyń aıtýynsha, osy maqsatta jolaýshylar kóligi basqarmasyna 791,5 mln teńge qarastyrý kózdelgen. Onyń 747,2 mln teńgesi aýdandyq mańyzdaǵy avtojoldardy jóndeýge jumsalmaq.

«Oblystaǵy Qarasý, Oktıabr, Shalǵyshy, Krasnyı Oktıabr, Asımov, Abaı, Novoselov, Borovskoı, Uzynaǵash, Bannov aýyldarynyń joldary qalypqa keltiriledi. Munyń syrtynda, oblystyq mańyzdaǵy Qarasý-Bolshoı Chýrakov, Rýdnyı-Qashar-Lısakov joldary jóndeledi. 21,1 mln teńge Rýdnyı qalasyndaǵy Volodarskıı kóshesin retke keltirýge beriledi. Artylǵan 23,2 mln teńge oblystyq mańyzdaǵy avtojoldar quqyǵy týraly sáıkestendirý qujattaryn ázirleýge jumsalady», - dedi basqarma basshysy.

Oblystyń energetıka jáne turǵyn úı sharýashylyǵy salasyna 646 mln teńge bólindi. Onyń teń jartysy - 373 mln teńge Arqalyq jylý energetıkalyq ortalyǵyna baǵyttalady.

«177,8 mln teńgeni Denısov aýdanynyń Frýnze, Krasnoarmeıskıı aýyldaryn, Taran aýdanynyń Valerıanov, Qarasý aýdanyndaǵy Vostok, Qarasý eldi mekenderin aýyzsýmen qamtýǵa shyǵyndaý kózdelip otyr. Osy qarjyǵa oblys ortalyǵyndaǵy Ýralskıı, Shıpın, Jaýynger-ınternatsıonalıster kóshelerindegi sý qubyrlary jóndelmek. Lısakov qalasynyń jylý jelilerin qalypqa keltirýge 50,9 mln teńge qarastyrylady», - dedi Gúlbaram Musaǵazına.

Arhımed Muhambetov 2025 jylǵa deıin oblys joldarynyń máselesi 98% sheshilýi kerektigin aıtty. Óńirdegi jol toraby el boıynsha qashyqtyq jóninen ekinshi orynda, sondyqtan bul jeńil-jelpi sharýa emes, qomaqty qarjy tartýdy talap etedi.

«Osydan birneshe jyl buryn respýblıkalyq bıýdjetten 20-30 mlrd teńge bólingen bolsa, ol búginde 80 mlrd teńgege jetti. Alaıda biz ortaq qarjylandyrýǵa kóńil bólýimiz kerek. ıAǵnı jergilikti bıýdjettiń mindetti úlesi bolýy tıis. Qazir jergilikti bıýdjet qory ósip keledi. Sonda da biz ony jaqsartýǵa jumys isteı berýimiz qajet. Bolashaqta budan da qomaqty qarjy bólinse ortaq qarjylandyrýǵa áleýetimiz jetýi kerek. Kóp jumys atqaryldy. Biraq qýanýǵa áli erte», - dedi aımaq basshysy.

Buǵan deıin Qostanaı oblysynda 1442 shaqyrym elektr jelisin jóndeý josparlanǵanyn habarlaǵan bolatynbyz.