Qostanaıda birinshi ret jemqorlyqqa qarsy spektakl qoıyldy
І.Omarov atyndaǵy oblystyq qazaq drama teatrynda «Jemqorlyq - áleýmettik dert» atty sybaılas jemqorlyqqa qarsy spektakldiń tanystyrylymy ótti. Bul ıdeıanyń avtory - oblystyq memlekettik qyzmet isteri departamenti. «Jemqorlyq - áleýmettik dert» pesasy bolǵan oqıǵanyń jelisinde qoıyldy. Departament basshysy Salaýat Múksimovtiń aıtýynsha, ártister bul spektakl arqyly jemqorlyqtyń qoǵamǵa tıgizetin jaǵymsyz tustaryn kórsetkisi keldi.
«Jemqorlyqpen kúres búgingi qoǵamdaǵy ózekti máselelerdiń birine aınaldy. Bul qoıylymdy óńirdiń memlekettik qyzmetkerleri asyǵa kútti. Menińshe, pesany ár qostanaılyq memqyzmetshi kórýi tıis. Ár qala men aýdanǵa baryp, halyqqa usynsaq degen oı bar. Ártister taqyrypty jan-jaqty ashyp berdi. Premera óz deńgeıinde ótti», - dedi Salaýat Múksimov.
Kórermender de mundaı qoıylymdardy jıiletý kerek dep esepteıdi. Sebebi, mádenı-qoǵamdyq oryndarda jemqorlyqtyń zardaptary týraly jıirek aıtylýy tıis.
Aldaǵy ýaqytta oblystyq memlekettik qyzmet isteri departamenti men qazaq drama teatry ózara jobalardy iske asyrýǵa kelisti.
