Qostanaıda bir jylda 5 myńnan astam kólik shyǵaryldy
QOSTANAI. Ótken jyly oblys boıynsha avtoóndiris 2,4 esege ósken. Bul týraly ákimdikte ótken jıynda oblys ákiminiń orynbasary Erlan Spanov málimdedi, dep habarlaıdy QazAqparat tilshisi.
Erlan Spanovtyń sózinshe, 2017 jyly 95,3 mlrd teńgeniń ónimderi óndirilipti. Ótken jyly oblysqa quıylǵan ınvestıtsııa kólemi 3%-ǵa artqan. Al syrtqy qarjylandyrý 2 esege ulǵaıtylyp, alǵash ret 200 mlrd teńgeden asty. Bul - údemeli ındýstrııa baǵdarlamasynyń sheńberinde ashylǵan kásiporyndardyń úlken jetistigi.
«AllurGroup kompanııasyna qarasty «SaryarqaAvtoProm» JShS ótken jyly 5300 jeńil kólik qurastyrǵan. Sondaı-aq, IVECO markaly 410 dana avtobýs shyǵaryldy. Kólikterdiń sapasy sheteldik kompanııalardyń ónimderinen kem emes. Muny satyp alýshylardyń suranysynan baıqaýǵa bolady. Qoǵamdyq kólikterdiń basym bóligi búginde Astana qalasynda, jolaýshylar tasymaldaý isine jumyldyrylǵan. Ótken jyly zaýytta 1200 dana «Ravon» jáne 1000 dana Qytaıdyń «JAC» brendi óndiriske shyqty»,-deıdi E. Spanov.
Oblys basshysy Arhımed Muhambetov óndiris kólemin arttyrýdan bólek, shetelge ónim ótkizý jaǵyn qolǵa alý qajettigine basa nazar aýdardy.
«Byltyr «EKSPO-2017» halyqaralyq kórmesiniń arqasynda biraz avtobýstarymyz satylymǵa shyǵaryldy. Bıyl da sol údeden tómendemeı, satylym kólemin bir deńgeıde ustaýymyz qajet. Birinshiden, barlyq aýdan, qala ákimderi jergilikti ónimdi satyp alýlary kerek. Basqa oblystarǵa da usyndaı usynyspen shyǵýdy tapsyramyn»,-dedi aımaq basshysy.
Keńeste Qostanaı avtoóndirisiniń óńirge ınvestıtsııa tartýǵa belsendi túrde aralasyp kele jatqandyǵy aıtyldy. Máselen, ótken jyly ǵana Qytaıdyń eksport jáne ımportpen aınalysatyn memlekettik China National Machinery IMP. & EXP. CORP kompanııasy AllurGroup («SaryarqaAvtoProm» JShS - avt.) kompanııasymen birlesken kelimge qol qoıǵan bolatyn. Osy arqyly Qostanaı avtokólik qurastyrý zaýytyna 22,4 mln dollar ınvestıtsııa tartyldy.
