Qostanaıda bir jylda 3 myń traktor shyǵarylady
QOSTANAI. QazAqparat - Túrkistan oblysy ákiminiń orynbasary Erbol Tasjaryqov bastaǵan delegatsııa jumys saparymen Qostanaı oblysyna keldi, dep habarlaıdy QazAqparat.
Bul sapardyń maqsaty - qos óńirge ınvestıtsııa tartý, sonymen qatar Qostanaı oblysynyń aýyl sharýashylyǵyndaǵy ozyq tájirıbesin baqylaý. Túrkistandyqtar aýylsharýashylyq tehnıkasy men qalalyq avtobýstardy satyp alý boıynsha kelissózder júrgizýdi de osy sapar barysynda talqylady.
Qostanaı oblysy ákiminiń orynbasary Meıirjan Myrzalıev aıtqandaı, óńiraralyq kooperatsııa sheńberinde yntymaqtastyqty jolǵa qoıý kózdelgen. Meımandar Qostanaı qalasyndaǵy ındýstrııalyq aımaqqa baryp, ótken jyly iske qosylǵan óndirister oshaqtarymen tanysty. Máselen, munda reseılik «Kompozıt Grýpp» kompanııasy Mınsk traktor zaýytymen (Belarýs) birigip traktor shyǵarý isin qolǵa aldy. Jospar boıynsha Qostanaıda jylyna 3 myńǵa deıin traktor satýǵa shyǵarylady. Kezdesýde aıtylǵandaı, reseılik ınvestorlardyń traktor shyǵarýdy Qostanaı aımaǵynda qolǵa alýynyń ózindik sebebi bar. Óıtkeni, Qostanaı - Reseı naryǵyna jaqyn jatqan agroónerkásibi damyǵan óńir. Sondyqtan ónim eksporttaýǵa asa qolaıly. Munyń syrtynda, astyqty aımaqta tehnıka parkin jańartýdy qajet etetin sharýashylyqtar da jeterlik.
Aldaǵy ýaqytta «Kompozıt Grýpp» kompanııasy Túrkistan oblysyna «Belarýs» traktorlaryn jetkizýge ýáde etti.
Túrkistan delegatsııasy Qostanaı oblysy ákimi Arhımed Muhambetovpen kezdesip, kelissózder júrgizdi. Nátıjesinde, eki tarap bilim jáne densaýlyq saqtaý salalary boıynsha tájirıbe almasady.
Jaqynda Qostanaı oblysynyń delegatsııasy Túrkistanǵa baryp, memorandýmǵa qol qoıýǵa kelisti.
