Qostanaıda bir kúnde 250 tonna un shyǵaratyn dıirmen kesheni ashyldy

Búgin qostanaılyq «Best Kostanay» JShS kezekti dıirmen keshenin iske qosty. Ashylý saltanatyna qatysqan oblys ákimi Arhımed Muhambetovtiń aıtýynsha, áleýetti kásiporyndar óńir damýynyń basty kórsetkishi sanalady.

«Agrarly oblys úshin dándi daqyldardy saqtap, qaıta óńdeıtin kásiporynnyń iske qosylýy asa mańyzdy shara. Elimizdiń bas qalasynyń týǵan kúninde áleýetti dıirmen keshenin ashyp otyrmyz. Bul seriktestik óńirdiń áleýmettik-ekonomıkalyq damýyna úlesin qosyp, agrarly salanyń damýyna zor septigin tıgizedi. Biz de óz tarapymyzdan qoldaý kórsetýge ázirmiz. Óıtkeni, Elbasy ındýstrııalyq-ınnovatsııalyq damý baǵdarlamasynyń ekinshi besjyldyǵynda agrarly salaǵa basa nazar aýdarýdy tapsyrdy. Keleshekte «Best Kostanay» álemniń úzdik un eksporttaýshylarynyń biri bolatynyna senemiz», - dedi quttyqtaý sózinde oblys ákimi.

Atalmysh keshen kólemi boıynsha 1 300 tonna astyqty saqtaı alady. Bir kúnde 250 tonna un shyǵarýǵa qaýqarly. Munda joǵary surypty, birinshi, ekinshi surypty un shyǵarada. Qondyrǵylardyń barlyǵy Túrkııa elinen alyndy.

«Qostanaı eldegi astyqty ólke sanalady. Onyń bıdaıynyń sapasy joǵary. Biz Shveıtsarııanyń Jeneva qalasynda ótken sapa kóshbasshylary arasynda úzdik tanylyp, altyn júldeniń ıegeri atandyq. Álemniń 80-nen astam memleketi arasynda «Best Kostanay» Qazaqstan atynan qatysqan jalǵyz kompanııa boldy», - dedi «Best Kostanay» JShS basqarma tóraǵasy Nıhat Jan.

Onyń aıtýynsha, kompanııa keıingi segiz jylda dıirmen jumysymen myqtap aınalysyp keledi.

«Myna ózderińiz kórgen aýmaqtaǵy keshendi salýǵa qanshama kúsh ketti. Taqyr jerde jańa kombınat kóterdik. Jyldyq ónim kólemi 60 myń tonnadan asyramyz degen jospar qoıdyq. Joǵary tehnologııaly qondyrǵylardyń sapasy jaqsy. Bıdaıdy jýyp, tazalap, ony jaqsy úgedi. Ónim neǵurlym sapaly bolsa, soǵurlym ótimdiligi de joǵary bolady. Bizden shyqqan unnyń 95%-y Qyrǵyzstan, Ózbekstan, Túrikmenstan, Tájikstan, Aýǵanstan, Ázerbaıjan memleketterine eksporttalady. Qalǵany el aýmaǵynda saýdaǵa shyǵarylýda», - dedi ol.

Keshenniń jumysy tolyǵymen joǵary deńgeıli mýltı basqarý júıesimen avtomattandyrylǵan. Nıhat Jannyń sózinshe, búginde «Ýno», «Hılal», «Hazına-shah», «Mýbarek», «Elıt» undary alys-jaqyn shetelderde úlken suranysqa ıe. Atalǵan ónimderdiń sapasyn joǵaltpaı, ony arttyryp otyrý maqsatynda Túrkııadan qysqa merzimge arnaıy mamandar shaqyryldy. Olar jergilikti dıirmenshilerge jańa tehnologııanyń qyr-syryn úıretpek.