Qostanaıda bilim bóliminiń basshysy jaýapqa tartyldy
Memlekettik qyzmet isteri jáne sybaılas jemqorlyqqa qarsy is-qımyl agenttigi oblystyq departamenti basshysynyń orynbasary Ashat Eskendirovtiń sózinshe, memlekettik organdarda birneshe quqyqbuzýshylyq faktisi tirkelgen. Sonymen qatar, ádep jónindegi keńes jıi ótip turady. Bul azamattardyń quqyqtary men zańdy múddelerin qorǵaýǵa múmkindik beredi.
«Buǵan deıin ádep jónindegi keńestiń 4 otyrysy ótkizilip, bas-aıaǵy 23 másele qaraldy. Mysaly, Altynsarın aýdanynyń turǵyny keńes otyrysynda Altynsarın aýdanynyń bilim berý bóliminiń basshysy A. Mamaeva qatysty shaǵym aıtyp kelgen. Sózinshe, Mamaeva ózine jáne jubaıyna qosymsha fakýltatıvtik saǵat taǵaıyndaǵan. Bul qosymsha tólem engizý jáne sheshim qabyldaýdaǵy zańsyz artyqshylyq kórsetýge jatady. Departament qabyldaǵan sharalar qorytyndysy boıynsha bıýdjetke 236 myń teńge qaıtaryldy. Bólim basshysy memlekettik qyzmettiń bedelin túsiretin teris qylyqtar jasaǵany úshin QR memlekettik qyzmeti týraly Zańnyń 50-baby, 1-tarmaǵymen qyzmetke tolyq sáıkes emestigi týraly eskertý túrinde jaýapkershilikke tartyldy», - dedi Ashat Eskendirov.
Atalmysh departament turaqty negizde memlekettik organdar komıssııalarynyń qyzmetine taldaý júrgizip keledi. 2019 jyldyń 1 toqsanynda 238 memlekettik qyzmetshi tártiptik jaýapkershilikke tartyldy. Onyń ishinde 156 qyzmetkershe eskertý berilgen.
«157 memlekettik qyzmetshiń óz laýazymdyq mindetterin tıisinshe oryndamaǵany úshin jazalandy.
Mysaly, Qarabalyq kentiniń ákimi A.Shektibaev aýdan ákiminiń tapsyrmasyn ýaqytyly oryndamaǵany úshin sógis aldy, alaıda qyzmettik tergeý júrgizilgen joq. Jalpy, bizdiń departament 10 memlekettik organda jospardan tys tekserýler júrgizdi. Nátıjesinde Qostanaı qalasy ákimdiginde qyzmet alýshylardyń quqyqtary jıi buzylatyny anyqtaldy. Olarǵa qatysty turǵyndardan 5 shaǵym túsken», -dep atap ótti vedomstvo basshysynyń orynbasary.
Ashat Eskendirov departamenttiń «Úıge qyzmet kórsetý» jobasyna toqtaldy. Osy joba aıasynda departament qyzmetkerleri Memlekettik korporatsııamen birge densaýlyq jaǵdaıy nemese basqa da sebeptermen memlekettik qyzmetterge óz betinshe júgine almaıtyn adamdarǵa kómektesedi. Qazir bul joba Taran jáne Meńdiqara aýdandarynda jemisti júrgizilip keledi.