Qostanaıda bıdaı urlaǵandar seriktestikke 6,5 mıllıon teńge zalal keltirdi

ASTANA. KAZINFORM — Qostanaı oblysynda polıtseıler 54 tonna bıdaı urlyǵyn áshkereledi. Bul týraly Polisia.kz jarııalady.

Qostanaı oblysynda polıtseıler iri kólemdegi urlyqtyń jolyn kesti. Qaskóıler jańa ónimnen 54 tonna bıdaıdy urlap ketken. Barlyǵy «Ýchaske» jedel aldyn alý is-sharasy aıasynda júrgizilgen reıd kezinde anyqtaldy.

Jergilikti ýchaskelik ınspektor Meıirbek Nurgeldın men polıtsııa bólimi bastyǵynyń orynbasary Serik Bıketbaev Áýlıekól — Dıev tasjolynda tirkemesi bar KamAZ júk kóligin toqtatty. Júkke qatysty qujattar kúdik týdyrdy, al júrgizýshi astyqtyń qaıdan alynǵanyn jáne qaıda jetkizilip jatqanyn naqty túsindire almady. Júk kóligi polıtsııa bólimine jetkizilgen soń, bıdaıdyń «Dıev agrofırmasy» aýmaǵynan urlanǵany anyqtaldy. Keıinirek Amanqaraǵaı aýylyndaǵy aldyn ala jalǵa alynǵan qoımadan úsh kún buryn shyǵarylǵan urlanǵan bıdaı tabyldy.

Jalpy urlanǵan astyqtyń salmaǵy 54 tonnany qurady. Zalaldyń mólsheri shamamen 6,5 mıllıon teńgege baǵalandy.

Qazir urlyq faktisi boıynsha qylmystyq is qozǵaldy. Agrofırma qyzmetkeri men Novoselov aýylynyń turǵyny osy qylmysqa qatysy bar degen kúdikke ilindi. Tergeý aýdan prokýratýrasymen tyǵyz ózara is-qımylda júrgizilýde. Quqyq qorǵaýshylar qylmysqa qatysy bar barlyq adamdy anyqtaý úshin birlese jumys istep jatyr.

«Dıev agrofırma» JShS-niń atqarýshy dırektory Oleg Danılenkonyń aıtýynsha, urlyqqa basqa qyzmetkerlerdiń de qatysy bolýy múmkin. Ol tergeýdiń ádil ári ashyq júrgiziletinine senim bildirdi.

Bolashaqta mundaı jaǵdaılardy boldyrmaý úshin kásiporynda beınebaqylaý kameralaryn ornatý, kólikti baqylaý júıesin belsendirek paıdalaný jáne qyzmetkerlermen profılaktıkalyq áńgimeler júrgizý sııaqty qaýipsizdik sharalaryn kúsheıtýdi josparlap otyr. Polıtsııa barlyq kináliler zańǵa sáıkes qylmystyq jaýapkershilikke tartylatynyn atap ótti. Óńirde agrarlyq saladaǵy urlyqpen kúres erekshe baqylaýda bolady.