Qostanaıda benzın baǵasy taǵy da ósti

QOSTANAI. QazAqparat - Qostanaı oblysy ákimdigindegi apparat májilisinde oblystyq kásipkerlik jáne ındýstrııalyq-ınnovatsııalyq damý basqarmasy basshysy Murat Shaımovtyń esebi tyńdaldy, dep habarlaıdy QazAqparat tilshisi.

Búginde Qostanaı oblysynda 155 janar-jaǵarmaı stansasy jumys isteıdi. Munaı ónimderi Pavlodar jáne Atyraýdan jetkiziletin. Alaıda,  bul zaýyttardaǵy jóndeý jumystary áli aıaqtalǵan joq.

«Pavlodar munaı óńdeý zaýyty jospar boıynsha jóndeý jumystaryn osy jyldyń qazan aıynda bitirýi kerek edi. Alaıda, zaýyttyń qaıtadan iske qosylýy 25 jeltoqsanǵa keıin shegerildi. Endi tek AI-92 benzıni ǵana emes, dızeldik otyndy jetkizý jaǵy da qıyndaıyn dep tur. Qazir kóptegen operatorlar jaǵarmaıdy Reseıden tasýǵa májbúr. Sol sebepti, stansalardaǵy baǵa da turaqtamaı tur», - dedi Shaımov.

Onyń sózine qaraǵanda, qyrkúıek aıynda Energetıka mınıstrliginen AI-80 markaly 1380 tonna benzın suratyldy.

«Sol kezde mınıstrlik nebári 500 tonna AI-80 benzınin bóldi. Qazan aıynda suratylǵan 1256 tonna benzınniń 200 tonnasy jetkizilýi kerek-tin. Operatorlar aqshasyn tólese de, atalǵan kólemdegi janar-jaǵarmaıdy tolyqtaı almaǵan. Al qarashada oblysqa1571 tonna AI-80 benzıni qajet. Qazir «Gelıos» pen «QazMunaıGaz» operatorlarynan basqa elimizdiń basqa óńirlerine atalǵan markaly benzındi jetkizý múmkin bolmaı otyr», - dedi basqarma basshysy.

Osylaısha, qostanaılyq jaǵarmaı beketterinde AI-80 markaly benzın tapshylyǵy baıqalady.  Ony Reseıden ákelýge qalta kótermeıdi. Negizgi belgilengen baǵasy lıtrine 89 teńge bolǵanymen, Reseıden jetkizý úshin eki ese qarjy ketedi. Qazir beketterdegi baǵa taǵy da ósti. AI-92 benzıniniń baǵasy 160-169 teńge aralyǵynda bolsa, dızeldik otyn 155-ten 167 teńgege deıin barady.

Sonymen qatar, Shaımov benzın tapshylyǵyna el aýmaǵyn tranzıtpen kesip ótetin kólikterdiń úlken suranysy áser etip jatqandyǵyn aıtty.