Qostanaıda «Belarýs» traktory qurastyrylady

Reseılik «Kompozıt Grýpp» holdıngi aýyl sharýashylyǵy kásiporyndary úshin jylyna 3 myń «Belarýs» traktoryn qurastyryp shyǵarýdy kózdep otyr. Bul týraly atalǵan holdıng dırektorynyń orynbasary Andreı Gamaıýnov oblys ákimi Arhımed Muhambetovtiń qatysýmen ótken jıynda málim etti. 

«Jalpy quny 2 mlrd teńge bolatyn ınvestıtsııalyq joba 150 adamdy turaqty jumyspen qamtıdy. Mamandar jergilikti turǵyndardan iriktep alynady. Olarǵa aldyn ala arnaıy oqý kýrstary ótkiziledi. Úıretýshiler qatarynda aýylsharýashylyq tehnıkalaryn jetik biletin bilikti mamandar bolady», - dedi ol. 

Reseılik ınvestorlardyń traktor shyǵarýdy Qostanaı aımaǵynda qolǵa alýynyń ózindik sebebi bar. Óıtkeni, Qostanaı - Reseı naryǵyna jaqyn jatqan agroónerkásibi damyǵan óńir. Sondyqtan ónim eksporttaýǵa asa qolaıly. Munyń syrtynda, astyqty aımaqta tehnıka parkin jańartýdy qajet etetin sharýashylyqtar da jeterlik. 

«Belarýs» bólshekteri Qostanaıǵa osy aptadan bastap jetkizilip, birden qurastyryla bastaıdy. Oblys ákimi atalǵan ınvestıtsııalyq jobany qoldaıtynyn bildirdi. 

«Respýblıka boıynsha shamamen 8 myńnan astam MTZ traktory bar. Onyń jartysynan kóbi jańartýdy qajet etedi. Óńirde jańa qolǵa alynyp jatqan mal sharýashylyǵyn damytý baǵdarlamasyn ilgeriletýge dál osy úlgidegi traktorlar qajet. Onyń ústine, ózgelermen salystyrǵanda, bul traktorlar anaǵurlym arzan. Sondyqtan ózimizde jáne oblystan tys aımaqtarda neshe traktor bar? Olardyń jaı-kúıi qalaı? Neshe tehnıka jańalaýdy qajet etedi? Osy máselelerdi naqty taldap-bilip, anyqtaý qajet. Іrgeles oblystardyń ókilderin shaqyryp, 920 modeldi traktorlardy ótkizý týraly memorandýmǵa qol jetkizý kerek», - dedi Arhımed Muhambetov. 

Aıta keteıik, aldaǵy ýaqytta óńirde «Kırovets» traktorlaryn shyǵaratyn zaýyt iske qosylady.