Qostanaıda basshylyq laýazymdaǵy 14 memqyzmetshi jaýapqa tartyldy

QOSTANAI. QazAqparat – Qostanaı oblysynda tártiptik jaýapkershilikke tartylǵan memlekettik qyzmetkerlerdiń kóbi basshylyq laýazymdardy atqarady. Bul týraly búgin brıfıngte QR Memlekettik qyzmet isteri agenttiginiń Qostanaı oblysy boıynsha departamentiniń basshysy, Ádep jónindegi keńestiń tóraǵasy Ashat Eskendirov aıtty, dep habarlaıdy QazAqparat tilshisi.

2020 jyly memlekettik qyzmetshilerdiń 50 paıyzǵa jýyǵy tártiptik teris qylyq jasaǵany úshin jaýapqa tartyldy. Olardyń deni eskertý alsa, taǵy birneshe qyzmetkerge qatań sógis berilip, jumysynan bosatyldy.

Ashat Eskendirov aıtqandaı, memlekettik qyzmetshilerdiń Etıkalyq kodeksine sáıkes, laýazymdy tulǵalar ózderiniń qaramaǵyndaǵy jumyskerler úshin úlgi bolýy kerek. Alaıda jumys tájirıbesi basqany kórsetip otyr.

«Departament qoldanystaǵy zańnamany iske asyryp, memlekettik organdardaǵy atqarýshylyq quramnyń qyzmetshilerin de jaýapqa tartty. Ádep jónindegi keńestiń usynymdarymen 2020 jyly basshylyq laýazymdaǵy 14 memlekettik qyzmetshi jaýapqa tartyldy. Ókinishke oraı, memlekettik qyzmetshilerdiń tártiptik quqyq buzýshylyq jasaýynyń sebepterine qarapaıym jaýapsyzdyqty jáne tıisti baqylaýdyń bolmaýyn jatqyzamyz», - dedi departament basshysy.