Qostanaıda bas dáriger mas kúıinde kólik júrgizgeni úshin qamaýǵa alyndy

QOSTANAI. KAZINFORM — Qostanaı oblystyq aýrýhanasynyń bas dárigeri kólik júrgizý quqyǵynan aıyrylyp, 15 táýlikke ákimshilik qamaýǵa alyndy dep jazdy Kazinform agenttiginiń tilshisi. 

Qostanaı oblysy Densaýlyq saqtaý basqarmasynyń baspasóz qyzmeti oblystyq aýrýhananyń bas dárigeriniń mindetin atqarýshysyna qatysty avtokólikti alkogoldik mas kúıde basqarǵany úshin sot ákimshilik qamaý jazasyn taǵaıyndaǵanyn rastady. Oqıǵa 22 maýsymǵa qaraǵan túni, jeke ýaqytta, demalys kúni bolǵan.

Basqarma bul oqıǵany azamat retinde minez-qulyq normalaryn buzý dep baǵalap otyr, biraq kásibı mindetterin atqarýmen baılanysty emes ekenin atap ótti.

— Sot sheshimi oryndalǵan soń, qyzmetkermen profılaktıkalyq áńgime júrgizilip, tıisti kadrlyq sheshim qabyldanady. Biz árbir azamattyń, laýazymyna jáne mártebesine qaramastan, jeke jaýapkershilikke ıe ekenin jáne zań aldynda bári teń ekenin aıtqymyz keledi, — dedi oblystyq densaýlyq saqtaý basqarmasynda.

Oblystyq sottyń baspasóz qyzmeti bas dárigerge 15 táýlik ákimshilik qamaý jáne 7 jyl merzimge kólik júrgizý quqyǵynan aıyrý jazasy taǵaıyndalǵanyn málimdedi.

Sot otyrysynda er adam óz kinásin tolyq moıyndap, jasaǵan isine ókinetinin aıtqan. Іs materıaldarynda medıtsınalyq kýálandyrý qorytyndysy, toqtatý ornynan beınejazba jáne polıtsııa qyzmetkerleriniń raporty usynylǵan. Medıtsına mamandarynyń qorytyndysyna sáıkes, júrgizýshi jeńil dárejedegi alkogoldik mas kúıde bolǵan.

Eske salaıyq, aımaqta ishimdikke qumarlyq ózekti máselege aınalyp barady. Sebebi, ár tórtinshi qylmys alkogoldiń saldarynan bolyp jatyr. Bul «statıstıkamen» Qostanaı oblysy eldegi ishimdikti tutyný boıynsha kósh bastap tur. Máseleni qalaı sheshýge bolady, táýeldiliktiń sebebi ne degen suraqtarǵa Kazinform tilshisi jaýap izdep, saraptap kórgen edi. Tolyǵyraq myna siltemede.