Qostanaıda barlyq mektep qashyqtan oqıtyn boldy
ASTANA. KAZINFORM — Oqýshylar 25 qarashadan bastap qashyqtan oqytýǵa aýysady, dep habarlaıdy Kazinform agenttiginiń tilshisi.
Qostanaı qalasynyń bilim bólimi sabaqtardy ýaqytsha qashyqtan oqytý formatyna kóshiretinin habarlady. Bul sheshim JRVI men tumaý jaǵdaılarynyń kóbeıýine, sonyń ishinde oqýshylar men pedagogtar arasynda qaıta syrqattaný derekteriniń artýyna baılanysty qabyldandy.
25 qarashadan osy aptanyń sońyna deıin Qostanaı qalasyndaǵy 37 jalpy bilim beretin mektep onlaın-formatta jumys isteıtin bolady. Bul shara bilim berý protsesiniń barlyq qatysýshysynyń qaýipsizdigin qamtamasyz etý jáne densaýlyǵyn saqtaý maqsatynda engizilip otyr. Apta qorytyndysy boıynsha óńirdegi epıdemıologııalyq jaǵdaı qaıta qaralady, sodan keıin oqý formaty boıynsha kelesi sheshim qabyldanady.
Oblystaǵy jaǵdaı
Bilim basqarmasynyń málimetinshe, Qostanaı oblysynda 79 mekteptiń 907 synyby qashyqtan oqyp jatyr, bul — 18 135 oqýshy.
Óńirde barlyǵy 440 jalpy bilim beretin mektep jumys isteıdi, onda 113 167 bala bilim alady. Onlaın-formatqa tolyq kóshkender:
Qarabalyq aýdanyndaǵy 3 mektep;
Altynsarın aýdanyndaǵy 5 mektep;
Qostanaı aýdanyndaǵy 3 mektep;
Kamysty aýdanyndaǵy 1 mektep.
Qalǵan bilim berý uıymdarynda epıdemıologııalyq shekti deńgeıden asqan jekelegen synyptar ǵana qashyqtan oqýǵa aýystyryldy.
Kolledjderdegi jaǵdaı
Oblysta 33 TjKB uıymy jumys isteıdi (26 memlekettik, 7 jeke).
2025 jylǵy 24 qarashadaǵy jaǵdaı boıynsha 20 984 stýdenttiń 3 578-i syrqattanyp, aýrýhanaǵa tirkelgen (17%).
Tolyqtaı qashyqtan oqýǵa kóshkender:
Qostanaı qyzmet kórsetý salasy kolledji — 30,15% naýqas;
Qostanaı polıtehnıkalyq joǵary kolledji — 30,85% naýqas.
Jekelegen toptary qashyqtan oqýǵa aýystyrylǵan oqý oryndary:
Qostanaı ındýstrıaldy-pedagogıkalyq kolledji — 4 top;
Qostanaı qurylys kolledji — 1 top;
Qostanaı joǵary pedagogıkalyq kolledji — 2 top;
Qostanaı joǵary kolledji — 10 top.
Qashyqtan oqytýǵa kóshirý bir ınkýbatsııalyq kezeń ishinde top nemese synyp quramynyń 30%-dan astamy syrqattanǵan kezde júzege asyrylady.
Buǵan deıin Qaraǵandy oblysynda 30-ǵa jýyq synyp qashyqtan oqıtynyn jazǵan edik.