Qostanaıda balyqshylar mingen kólik muz astyna túsip ketti
QOSTANAI. QazAqparat - Qostanaı oblysynda «Toyota Land Cruiser 100» avtokóligi muz astyna túsip ketti. Kólik ıesi men jolaýshy zardap shekken joq, dep habarlaıdy QazAqparat oblystyq polıtsııa departamentiniń baspasóz qyzmetine silteme jasap.
Oqıǵa Jankeldın aýdanynda bolǵan. Astanalyq eki jigit Aqshyǵanaq aýylyna balyq aýlaýǵa kelgen.
«Elordanyń eki turǵyny mingen «Toyota Land Cruiser 100» markaly avtokóligi muz astyna túsip ketti. Balyqshylar kólik ishinen shyǵyp úlgirgen. Bireýi oqıǵa ornynda qalyp, ekinshisi kómek suraý úshin jaqyn aýylǵa jol tartqan. Aqshyǵanaq aýylyna deıin 35 shaqyrym jerde oǵan jergilikti ýchaskelik ınspektor Dıdar Ábildá kezigedi. Olar birden oqıǵa ornyna keldi. Alaıda, bul ýaqytta avtokólik tolyǵymen sý astynda qalǵan», - delingen vedomstvonyń baspasóz habarlamasynda.
Ýchastkelik ınspektor birden qutqarý jumystaryn uıymdastyrýǵa kiristi. 10 shaqty aýyl turǵynyn tıep, oqıǵa ornyna júk kóligin alyp keldi. Barlyǵy jumylyp, «Djıpti» muz astynan shyǵardy. Al balyqshylardy Astana qalasyna taksıge otyrǵyzyp jiberdi.
Oblystyq TJD oblys turǵyndaryn barynsha abaı bolýǵa shaqyrady. Sebebi, qazirgi ýaqytta qar erip, muz juqara bastady. Qutqarýshylar kún jylyp, jer kepkenshe balyq aýlaýdan bas tartýdy usynady.
